Larrı Kıng óz mansabynyń 60 jyldan astam ýaqytyn radıo men televızııa salasyna arnap, álemniń kóptegen memleketiniń basshylarynan, tanymal tulǵalardan suhbat aldy. Ol júrgizgen CNN arnasyndaǵy Larry King Live baǵdarlamasyn shartaraptyń túkpir-túkpirindegi mıllıondaǵan kórermen tamashalady. 1985 jyldan 2010 jylǵa deıin jalǵasqan teleshoý jer-jahandaǵy eń úzdik jobanyń biri sanaldy.
Kıngtiń ómiri – jýrnalıstıkany serik etkenderdiń bárine úlgi. Ol 1933 jyly Nıý-Iorkte dindar evreılerdiń otbasynda dúnıege kelgen. Shyn aty – Lorens Harveı Zeıger.
Larrı 8 jasqa tolǵanda ákesi Edýard júrek talmasynan dúnıe salǵan. Sóıtip, qarshadaı Kıng anasyna kómektesip, otbasyn asyraýǵa májbúr bolǵan. Ol bala kezinen radıoda jumys isteýdi armandaıdy. Áıtkenmen, mektepti aıaqtaǵan soń eńbekke erte aralasýyna týra kelgen. Sóıtip, 20 jastaǵy Larrı poshta qyzmetimen aınalysatyn UPS kompanııasyna jumysqa turady. Biraq armanynan kúder úzbeıdi.
Onyń taǵdyryn ózgertýge bir oqıǵa qatty áser etedi. Birde ol CBS arnasynyń jýrnalısimen jolyǵyp qalady. Tájirıbeli mamanmen qumary tarqaǵansha áńgimelesedi. Sóıtip, jýrnalıstiń aqylyn tyńdap, Florıda shtatyna tartyp ketedi. Sáti túsip, Maıamıdegi radıostansalardyń birine dıdjeı qyzmetine iligedi.
Sóıtip júrgende radıodaǵy tilshilerdiń biri kenetten jumystan ketedi. Kıngtiń talabyn ańǵarǵan basshylyq oǵan baǵdarlama júrgizýge ruqsat etedi. Larrı dıdjeılikpen qatar jańalyqtar men sport aqparatyn tyńdarmanǵa jetkizip otyrǵan. Sol kezde onyń jalaqysy aptasyna nebári 50 dollar ǵana bolǵan eken.
Larrı Kıngtiń ómirindegi taǵy bir erekshe oqıǵa mynaý. Alǵashqyda ol radıoǵa shyn aty-jónimen Lorens Harveı Zeıger bolyp shyǵyp júredi. Birde basshylary dál tikeleı efır aldynda Zeıger esimi jurttyń esinde qalmaıtynyn aıtyp, tez arada tegin ultynan habar bermeıtin ataýǵa aýystyrýdy suraıdy. Larrı (Lorensti erkeletip osylaı ataǵan) uzaq oılanbastan, esine túsken alǵashqy tirkesti – King’s Wholesale Liquor jarnamasyndaǵy Kıng sózin tańdaıdy. Jańa esim jurtshylyqtyń nazaryn birden aýdarady. Sóıtip, ol eki jyldan keıin aty-jónin tolyqtaı Larrı Kıng dep ózgertedi.
Keıinirek eńbekqorlyǵy men tapqyrlyǵynyń arqasynda onyń júrgizgen radıo shoýlary tyńdarmannyń yqylasyna bólenedi. Osylaısha, aımaqqa tanymal jýrnalıske aınalady. 1970-shi jyldary ataǵy tipten aspandap, búkil AQSh-qa tanyldy. 1978 jyly Larrı Mutual Broadcasting System (MBS) radıosyna aýysady. Osynda ol Larry King Show tokshoýyn júrgizedi.
Atalǵan baǵdarlama Kıngtiń dańqyn shartarapqa jaıdy. MBS-te birneshe jyl jumys istegennen keıin CNN arnasy ony attaı qalap shaqyrtady. Sóıtip, Larrı Larry King Live tokshoýynyń negizin qalady. Bul baǵdarlamany 2010 jylǵa deıin turaqty júrgizdi.
Osy ýaqyt ishinde ol kóptegen tanymal tulǵalardan ıntervıý alǵan. CNN arnasynyń málimetine súıensek, jýrnalıstik mansabynda Kıng 50 myńnan astam adamnan suhbat alǵan eken. Olardyń qatarynda Martın Lıýter Kıng, Dalaı Lama, Bıll Geıts, Margaret Tetcher, Mıhaıl Gorbachev sekildi álemge áıgili tulǵalar bar. Sondaı-aq AQSh-tyń 38-shi prezıdenti Djerald Ford ta qonaqtarynyń biri bolǵan. Larrı Kıng sodan beri Barak Obamaǵa deıingi AQSh-tyń prezıdentteriniń bárinen ıntervıý alyp shyqqan.
Onyń 1993 jylǵy tokshoýyn bir sátte 16,3 mıllıon adam kórip, rekord ornatty. Kıngtiń 1995 jyly Palestına basshysy Iаsır Arafatpen, Izraıl premer-mınıstri Ishak Rabınmen jáne Iordanııa patshasy Hýseınmen júrgizgen ıntervıýleri de shartaraptyń qyzyǵýshylyǵyn oıatty.
Larrıdiń jýrnalıstıka salasyndaǵy marapattary myńdap sanalady. Solardyń ishinde Peabody syılyǵy men Emmı syılyǵynyń shoqtyǵy bıik. Sondaı-aq Cable ACE marapatyn 10 márte ıelengen.
Larrı Kıng – jýrnalıstıkada óz qoltańbasyn qaldyrǵan tulǵa. Ol eshqashan ıntervıý alyp otyrǵan qonaǵynyń ustanymyna qarsy keletin suraq qoımaǵan eken. Sondyqtan shyǵar, keıbireýler ony tym jeńil saýaldyń ıesi dep aıyptaǵan. Alaıda onyń osyndaı tásili kórermender men tyńdarmandarǵa qatty unaıtyn. Sol sebepti, jurtqa óz oıyn aıtýǵa qumar tanymal tulǵalar Larrı Kıngtiń ıntervıýine qýana-qýana kelisetin.
Kıngtiń taǵy bir ereksheligi – eshqashan suhbat alatyn adamynyń kitaptaryn oqymaıtyndyǵy. Tipti, ıntervıýge aldyn ala daıyndalmaıdy eken. О́ıtkeni ol suhbattasy týraly kórermender men tyńdarmandardan artyq bilýdi unatpaǵan. Onyń qoıǵan saýaldary keıipkeriniń bolmysyn ashýǵa baǵyttalǵan.
Tipti keıde eshkim kútpegen máselege toqtalady. Máselen, Kıng bir suhbatynda AQSh prezıdenti laýazymyn atqarǵan Rıchard Nıksonnan «Ýotorgeıttiń tusynan ótip bara jatqanda ózińizdi birtúrli sezinbeısiz be?» dep surapty. Esterińizde bolsa, Aq úıdi basqaryp turǵan R.Nıkson «Ýotergeıt shýy» dep atalǵan oqıǵadan keıin qyzmetinen ketken edi. Endi birde Ronald Reıganǵa «Eshteńeni eske túsire almasańyz, yzalanasyz ba?» degen saýal qoıypty.
Larrı Kıngtiń jýrnalıstıkadaǵy ustanymdary da ózgeshe. Ol bylaı deıdi: «Kún saıyn tańerteń búgin aıtatyndarym maǵan eshteńe úıretpeıtinin esime salyp otyramyn. Eger bir nárseni bilgim kelse, tyńdap úırenýim kerek. Sóılep jatqanymda eshqashan eshteńe úırengen emespin».
«Men bárin biletin sekildi kóringim kelmeıdi», deıdi ol. Sondyqtan ol suhbat bergen prezıdentterden óte kúrdeli saıası máselelerdi suramaıtyn. «Onyń ornyna «Prezıdent myrza, bul qyzmette sizge ne unaıdy?» nemese «О́mirińizdegi eń úlken qateligińiz qandaı?» dep aıtamyn», dep aǵynan jarylady Larrı.
Bireýden suhbat alýdyń ornyna, ózi ıntervıý bergende Kıng aǵynan jarylady. «Birde tilshi menen ózimdi qanshalyqty jýrnalıst sanaıtynymdy surady. «Bilmeımin», dep jaýap berdim. О́ıtkeni men tilshi bolyp Irakqa barǵym kelmeıdi, biraq onda barǵandarmen áńgimelesken unaıdy», deıdi ol.
«Nege degen suraqty qoıǵan jón. «Nege muny istedińiz?» Nege degen suraqqa bir ǵana sózben jaýap berilmeıdi».
«Tabysqa jetken adam baq týraly aıtpasa, óz-ózin aldap júr».
«Sport – maǵan qatty unaıdy. Eń áýeli sonyń jańalyqtaryn qaraımyn».
«Kedeı kezimdi eshqashan umytpaımyn. Jolym bolyp ketkeni týraly da oılaýdy toqtatqan emespin».
«Bastapqyda bárin isteı beretinmin. Maıamıde jańalyq júrgizdim, aýa raıyn habarladym, sport týraly aıttym, dıdjeı boldym».
«Bir nárse isteseń, onyń nátıjesin kút».
«Men United Parcel Service júk kóligine minip, úılerdi aralap sút sattym. Biraq árdaıym radıoda jumys isteýdi armandaıtynmyn».
Munyń bári – Larrı Kıngtiń ár jyldary aıtqan sózderi. Osydan birneshe jyl buryn ol bylaı degen eken: «Men qazir 80 jastamyn. О́skende ne isteıtinimdi áli bilmeımin».
