«Árıne, azamattyq qoǵammen baılanys ornatý – mınıstrlik quzyryndaǵy negizgi salalardyń biri. Bul rette, 2020 jyly 27 tamyzda Memleket basshysynyń jarlyǵymen Azamattyq qoǵamdy damytý tujyrymdamasy qabyldandy. Atalǵan qujat elimizdegi azamattyq sektordy damytýdyń aldaǵy on jylǵa arnalǵan negizgi strategııalyq baǵyttaryn aıqyndaıdy. Onyń úlken bir bólimi – bul sapaly zań shyǵarý. Bul rette, ózderińiz bilesizder, qoǵamdyq keńesterdiń múmkindigin keńeıtetin jáne mundaı Keńesterdi kvazımemlekettik sektorda da qurýdy mindetteıtin Zańǵa qol qoıyldy. Búginde «Qoǵamdyq baqylaý týraly» jańa zań jobasy men oǵan ilespe «onlaın-petısııa» týraly tolyqtyrýlar qoǵamda qyzý talqydan ótip jatyr», dedi A. Balaeva mınıstrliktiń keńeıtilgen alqa májilisinde.
Onyń aıtýynsha, aldaǵy ýaqytta qaıyrymdylyq jáne volonterlik jónindegi zań jobalaryn jetildirý josparda bar.
«О́zderińiz kýá boldyńyzdar, Prezıdent bastamasymen jarııalanǵan «Volonterler jyly» – eriktiler qozǵalysynyń damýyna tyń serpin bergen jasampaz joba boldy. Sondyqtan da, el Prezıdenti Úkimetke bul jumysty turaqty túrde jalǵastyrýdy tapsyrdy. Qazir arnaıy Jol kartasy jasaqtalyp, iske asýǵa daıyn. Munyń ózi - «Volonterlik» uǵymnyń aýqymy keń jáne ol bir jylmen nemese bir joba aıasynda ǵana shektelmeıtindigin kórsetedi», dedi mınıstr.
