“Osy jyldar ishinde elimizde Elbasymyz Nursultan Ábishuly Nazarbaevtyń bastamasymen birqatar saıası, ekonomıkalyq jáne áleýmettik reformalar tabysty iske asyryldy. Kóptegen tyń baǵdarlamalar men jobalar qolǵa alyndy. Sonyń bárinde Parlament erekshe ról atqardy. Sebebi, Parlament sapaly zańdar arqyly ulttyq múdde jolynda atqarylǵan ár jumystyń quqyqtyq negizin qalyptastyryp otyrdy.
Qazirgi kezeńde Memleket basshysy Qasym-Jomart Kemeluly Toqaevtyń keshendi jańǵyrý baǵdarlamasyn sátti júzege asyrýdy zańnamalyq turǵydan qamtamasyz etý – Parlamenttiń basty mindeti.
Jalpy, shırek ǵasyrda Parlament Otanymyzdyń ósip-órkendeýine yqpal etetin 2940 zań qabyldaǵan eken. Onyń 200-den astamyna depýtattar bastamashy boldy. Halyq qalaýlylary tek zań shyǵaryp qana qoımaı, depýtattyq saýaldar arqyly da qoǵamdy alańdatqan kóptegen máseleniń oń sheshilýine atsalysyp keledi. Máselen, 25 jylda tek senatorlardyń ózderi 2140 saýal joldap, halyqtyń únin bılikke jetkize bildi.
Sońǵy konstıtýsııalyq reformanyń nátıjesinde elimizde Parlamenttiń ókilettigi kúsheıtilgeni belgili. Sol arqyly zań shyǵarý qyzmetine tyń serpin berildi. Prezıdentimizdiń bastamasymen Parlamenttik oppozısııa ınstıtýtynyń zańmen bekitilýi de ókildi organnyń bedelin ósirgen mańyzdy qadam boldy.
Sondaı-aq, halyqaralyq yntymaqtastyqty nyǵaıtý máselesinde Parlamenttiń alar orny bólek. Búginde barlyq seriktes memleketterdiń Parlamentterimen tyǵyz baılanys ornady. Parlamentaralyq uıymdarmen de qarym-qatynas júıeli jolǵa qoıyldy.
Qazirgi tańda qos palataly Parlament tolyq qalyptasyp jáne ózin bıliktiń negizgi tarmaqtarynyń biri ekenin is júzinde naqty dáleldep úlgerdi. Shyn máninde, zań qabyldaý barysynda Májilistiń de, Senattyń da mańyzy zor. Bul jerde, eń aldymen, tutas eldiń jáne ár óńir men ár azamattyń múddesi erekshe nazarǵa alynady. Sol sebepti, zań jobalaryn qaraý kezinde osy máselelerge basa mán beriledi.
Parlamentte Palata otyrystarynan bólek, ózekti taqyryptarǵa arnalǵan parlamenttik tyńdaýlar, Úkimet saǵattary, kóshpeli otyrystar, dóńgelek ústelder, komıtetterdiń otyrystary jáne taǵy da basqa is-sharalar jumystyń negizgi baǵyttary bolyp sanalady.
Áriptesterimdi Parlamenttiń 25 jyldyǵymen quttyqtaı otyryp, zań shyǵarý bıligin júzege asyratyn eń joǵary ókildi organ aldaǵy ýaqytta da táýelsiz Qazaqstannyń odan ári damýy úshin nátıjeli qyzmet ete beredi dep senemin”, delingen Máýlen Áshimbaevtyń jazbada.
