Jol apaty jóninde polısııa departamentiniń kezekshi bólimine qońyraý 10.39.-da túsipti. Oqıǵa ornyna kezekshi ekıpajdardan bólek, jedel tergeý toby da jetken.
Jol-kólik oqıǵasynda Lada granta, Volkswagen Passat, Toyota Camry, VAZ -2114 jáne Chevrolet Aveo jeńil kólikteri zardap shekken. Lada granta-da otyrǵan jolaýshy, 1962 jyly týǵan er adam oqıǵa ornynda qaza tapqany belgili boldy. Jaraqat alǵan taǵy úsh adam Aqjaıyq aýdandyq aýrýhanasyna jetkizilgen. Jolaýshylar búgin kúnniń tuman, joldyń taıǵaq ekenin aıtýda. Qazir apat sebebi anyqtalýda. Aldyn ala zertteýlerge qaraǵanda, Chevrolet Aveo avtokóligi joldyń qarsy betine shyǵyp ketip, Lada granta-men soqtyǵysqan. Osy oqıǵa boıynsha Qylmystyq kodekstiń 345 baby boıynsha is qozǵaldy.
Oral-Atyraý kúre joly respýblıkalyq mańyzy bar jol sanalǵanymen, eki-aq jolaǵy bar. Jol apaty jıi bolady. Jergilikti bılik oryndary bul joldyń Oral-Chapaev eldimekenderiniń arasy keńeıtilip, 4 jolaqqa aınalatynyn habarlaǵan bolatyn.
Polısııa departamentiniń habarlaýynsha, jyl basynan beri Batys Qazaqstan oblysynda 12 jol-kólik oqıǵasy bolyp, 5 adam qaza tapqan.
