Bul týraly Ranking.kz óziniń kezekti zertteýinde jarııa etti. Jyl basynda Qazaqstanda 330,3 myń kompanııa tirkelgen. Bul aldyńǵy jylmen salystyrǵanda 7,2 paıyzǵa kóp. Solardyń 99 myń kompanııasyn áıelder basqaryp otyr. Bul kórsetkish te byltyrmen salystyrǵanda 7 paıyzǵa joǵary eken. Degenmen basqarýshy kompanııalardaǵy áıelder úlesi úshinshi jyl qatarynan 30 paıyzdan aspaı otyr. Áıelder úlesi eń kóp tirkelgen uıym – ortasha kompanııalar. Atalǵan mekemedegi áıelder sany 35,7 paıyzǵa jetken. Kishigirim kompanııalardaǵy basqarýshy áıelder úlesi 30 paıyzdan 29,9 paıyzǵa qysqarǵan. Bul rette sońǵy jylda iri kompanııalardaǵy áıelder basshylyq jasap otyrǵan kásiporyndar sany 18,8 paıyzdan 18 paıyzǵa azaıypty.
Genderlik teńsizdik mólsherin esepteýmen aınalysatyn dúnıejúzilik ekonomıkalyq forýmnyń Global Gender Gap Report 2020 baıandamasynda Qazaqstannyń reıtıngtegi 153 eldiń ishinde 72-orynda ekeni aıtylady. EAEO elderi ishindegi úzdik kórsetkish Belarýsııaǵa tıesili – 29-orynda. Al Reseı 81, Qyrǵyzstan 93, Armenııa 93-oryn alǵan. Reıtıngte kósh bastap turǵan elder – Islandııa, Norvegııa, Fınlıandııa. Er men áıel arasyndaǵy teńsizdik ýshyqqan elder Sırııa, Pákistan, Irak, Iemen reıtıngti qorytyndylaıdy.
Álemdegi genderlik teńsizdik ındeksi tórt negizgi kórsetkishke súıene otyryp shyǵarylady, olar – ekonomıkalyq qatysý, kareralyq múmkindik, bilim, densaýlyq jáne saıası quqyq. Qazaqstan áıelderi ekonomıkalyq qatysý jáne karera múmkindigi turǵysynan 37-oryn alǵan (153 eldiń ishinde). Bul oraıda Belarýs 5, Reseı 32-orynǵa ıe. Armenııa 78, Qyrǵyzstan 88-orynda.
