«Elorda tek eresekterge emes, balalar úshin de yńǵaıly bolýy kerek. Bilim berý nysandarymen qatar, demalys ortalyqtaryn ashyp, aýlalardy abattandyramyz. Mysaly, qalada balalar túrli ónermen aınalysatyn oqýshylar saraıy bar. Bıyl taǵy bir oqýshylar saraıynyń qurylysyn bastaımyz», dep jazdy qala ákimi.
Sondaı-aq ol mádenı jáne sporttyq ǵımarattar balalarǵa qoljetimdi bolýy kerek ekenin aıtty.
«Ár balanyń osy mekemelerge barýǵa jáne prosesti ishinen kórýge múmkindigi bolýy tıis. «Astana Opera» teatrymen birlesip joba jasaǵanbyz. Oqýshylar Lıýdvıg Mınkýstyń «Baıaderka» baletine tegin baryp, óz isiniń sheberlerimen áńgimelese aldy, sondaı-aq, olarǵa balettiń tarıhy týraly aıtyldy, grım jáne kostıým sehtaryn, mýzykalyq kitaphanany, daıyndyq zaldaryn jáne t. b. kórsetildi. Mundaı teatr sabaqtary bizdiń balalarymyzǵa materıaldy jaqsy meńgerýge múmkindik beredi, óıtkeni olar endi oqýlyqtaǵy mátindi ǵana emes, sonymen birge qoıylymnyń ózin, kostıýmderdi, keıipkerlerdiń ózderin de kóredi. Bul bizdiń balalarymyzdy mádenı turǵydan baıytýǵa múmkindik beredi», - deıdi ákim.
Onyń aıtýynsha bul jobany keńeıtý uıǵarylyp otyr. Ashyq sabaqtar Qallekı teatrynyń ǵımaratynda, "Barys Arena" stadıonynda, Ulttyq kitaphanada ótetin bolady.
«Memleket basshysy oqýshylarymyzdyń oqyrmandyq daǵdysy tıisti deńgeıde damýy keregin atap ótken. Ulttyq kitaphanaǵa ekskýrsııa kezinde balalar muraǵattaǵy kóptegen kitaptardy ala alady, jazýshylar týraly kóbirek bilip, murajaıdy kóredi, bul - jańa bilim alýǵa degen áýestikti sózsiz arttyrýy kerek.
Osy jobalar oqýshylarǵa adamgershilik-rýhanı qundylyqtardy jáne mádenıetke/sportqa degen súıispenshilikti mektep qabyrǵasynan bastap oıatyp qana qoımaı, talantyn ashýǵa, sonymen qatar, adam eńbegin qurmetteýge múmkindik beredi. Jobalardy mádenıet jáne sport mınıstrligimen birlesip júzege asyramyz», dep jazdy Altaı Kólginov.
