Áıelder arasynda Shteffı Graftyń aldyna túsetin eshkim joq. 1982-1999 jyldar aralyǵynda atoı salǵan Germanııanyń Mangeım qalasynyń týmasy «Úlken dýlyǵa» týrnırleriniń barlyǵynda bas júldeni oljalady. Tarqatyp aıtsaq, Ýımbldonda – jeti, Rolan Garrosta – alty, AQSh-tyń ashyq birinshiliginde – bes jáne Aýstralııanyń ashyq birinshiliginde – tórt ret top jardy. Barlyǵy 107 týrnırde dara shyqty. Graf baqandaı 377 apta boıy WTA tiziminde kósh bastady. Iаǵnı sol kezderi Jer-jahanda nemis tennısshisimen teńese alatyn oıynshylar kemde-kem edi. Tipten, Shteffıdiń basty básekelesteriniń biri sanalǵan ıspanııalyq Arancha Sanches-Vıkarıonyń: «Ony endi eshkim toqtata almaıdy. Men Jaratýshydan bir-aq nárse suraımyn – Shteffı tezirek kúıeýge shyǵyp, úlken sporttan qol úzse eken. Bizdiń baq juldyzymyz sonda ǵana jarqaraı janady», dep jylarman bolǵanyna mıllıondaǵan jankúıer kýá. Iá, bul – ras sóz. Nemis tennısshisi óz dáýiriniń eń myqty oıynshylarynyń barlyǵyn sypyra utty. Oǵan tek Martına Navratılova ǵana laıyqty qarsylyq kórsete aldy. Eki myqty 18 márte kezdesip, árqaısysy toǵyz retten jeńiske jetken eken.
Kezinde Shteffı Graftyń ózin qaımyqtyrǵan Martına Navratılova jaıynda da uzaq áńgimeleýge bolady. Ol 332 apta boıy eshkimge ese jibergen joq. Chehoslovakııanyń astanasy – Pragada týyp-ósken Martına keıinnen AQSh-qa qonys aýdardy. Sporttyq karerasyn 1975 jyly bastaǵan ol 2006 jyly kortpen qosh aıtysty. 30 jyldan asa ýaqyt aralyǵynda Navratılova Ýımbldondy – toǵyz, AQSh-tyń ashyq birinshiligin – tórt, Aýstralııanyń ashyq birinshiligin – úsh jáne Rolan Garrosty eki ret utty. Barlyǵy 167 týrnırde qarsylas shaq keltirmedi. Amerıkalyq tennısshi 50 jasqa kelgende ǵana úlken sportpen qosh aıtysatynyn resmı túrde jarııa etti.
Qazirgi kezde óreli ónerimen kórermenderdi qýantyp júrgen Serena Ýılıams 319 apta eń bıik tuǵyrdan túsken joq. Kezinde onyń da tańdaı qaǵarlyqtaı tabystarǵa qol jetkizgeni jankúıerlerdiń jadynda. Jekelegen saıystarda AQSh-tyń Mıchıgan shtatynyń týmasy Aýstralııanyń ashyq birinshiligi men Ýımbldonda – jeti retten, AQSh-tyń ashyq birinshiliginde – alty jáne Rolan Garrosta úsh ret jeńimpaz atandy. Barlyǵy – 23. Sonymen qatar Serena óziniń týǵan ápkesi Vınýs Ýılıamspen birge juptyq básekelerde de «Úlken dýlyǵa» týrnırleriniń barlyǵyn utty. Bul kúnderi jasy 40-qa taıap qalǵan amerıkalyq oıynshy áli de babynda deýge bolady.
HH ǵasyrdyń 1972-1989 jyldar aralyǵynda óner kórsetken amerıkalyq Krıs Evert 260 apta boıy aldyńǵy lekten kórinse, shveısarııalyq Martına Hıngıs 209 apta shashasyna shań juqtyrmady. Ol óz mansabyn 1994 jyly bastap, 2017 jyly aıaqtady. 1989-2008 jyldary kortty shaıqaǵan AQSh-tyń taǵy bir ókili Monıka Selesh 178 apta bıik tuǵyrdy bosatqan joq. Bir aıta keterligi, Navratılova men Selesh sosıalıstik júıeni ustanǵan memleketterde týyp-ósti. Naqtylap aıtsaq, joǵaryda atap kórsetkenimizdeı, Martına Chehoslovakııada týsa, Monıka – Iýgoslavııanyń týmasy. Alaıda naǵyz kemeldengen kezderinde olar dáýleti tasyǵan ózge eldiń – AQSh-tyń týy astynda óner kórsetýdi qup kórdi.
Úzdikter tiziminde jetinshi, segizinshi jáne toǵyzynshy oryndardy belgııalyq Jıýstın Enen (117 apta), amerıkalyq Lındseı Devenport (98 apta) jáne danııalyq polıak qyzy Karolına Voznıaskı (71 apta) ıelenýde. Bul oıynshylar sporttyq kareralaryn aıaqtaǵan. Endi olardyń óz kórsetkishterin jaqsarta almaıtyny anyq. Al odan keıingi satylarǵa jaıǵasqan rýmynııalyq Sımona Halep (64 apta), aýstralııalyq Eshlı Bartı (57 apta), belarýstik Vıktorııa Azarenkonyń (51 apta) joǵarylaýyna tamasha múmkindik bar. Sebebi bulardyń barlyǵy da dáp qazirgi kezde óreli ónerlerimen kózge túsýde. Máselen, 24 jastaǵy Bartı bul kúnderi álemdik reıtıngte kósh bastap tur. 29 jastaǵy Halep ekinshi oryndy oljalasa, 31 jastaǵy Azarenko 13-satyǵa jaıǵasqan.
Sondaı-aq Amelı Moresmo (Fransııa, 35 apta), Anjelıka Kerber (Germanııa, 34 apta), Dınara Safına (Reseı, 26 apta), Naomı Osaka (Japonııa, 25 apta), Treısı Ostın (AQSh, 21 apta), Marııa Sharapova (Reseı, 21 apta), Kım Kleısters (Belgııa, 20 apta), Elena Ivanovıch (Serbııa, 18 apta), Djenıffer Kaprıatı (AQSh, 17 apta), Ana Ivanovıch (Serbııa, 12 apta), Arancha Sanches-Vıkarıo (Ispanııa, 12 apta), Vınýs Ýılıams (AQSh, 11 apta), Karolına Plıshkova (Chehııa, 8 apta), Garbıne Mýgýrýsa (Ispanııa, 4 apta) jáne Ivonn Gýlagong-Koýlı (Aýstralııa, 2 apta) syndy sulýlar ár jyldary álemniń birinshi raketkasy atandy. Ondaı baq nebári 27 tennısshige ǵana buıyrǵan eken.
Qazaqstannyń tennısshileri arasynda eń úzdik kórsetkishke Elena Rybakına qol jetkizdi. Byltyr Aýstralııanyń ashyq birinshiliginde úshinshi kezeńge deıin jetken jerlesimiz álemniń 17-raketkasy atandy. О́zge qyzdarymyzdyń eń úzdik nátıjeleri mynadaı: Iаroslava Shvedova – 25 oryn (2012 jyl), Iýlııa Pýtınseva – 27 oryn (2017 jyl), Zarına Dıas – 31 oryn (2015 jyl) jáne Galına Voskoboeva – 42 oryn (2012 jyl).
Al álemdik reıtıngte joǵarylaýyna tamasha múmkindik beriletin «Úlken dýlyǵa» sanatyndaǵy jarystarda eń táýir nátıje kórsetken oıynshylar – Shvedova men Pýtınseva. Iаroslava Rolan Garros (2010, 2012 jyldary) pen Ýımbldonda (2016 jyl) shırek fınalǵa deıin jetse, Iýlııa Rolan Garros (2016, 2018 jyldary) pen AQSh-tyń ashyq birinshiliginde (2020 jyl) dál sol mejeden kórindi. Zarına Dıas bolsa, 2014 jáne 2015 jyldary Ýımbldonnyń tórtinshi kezeńinde kúsh synasty.
