Osy sharýanyń bárin «Qazaqstan medısına jastary» RQU oblystyq fılıalynyń tóraǵasy, Qaraǵandy medısına ýnıversıtetiniń besinshi kýrs stýdenti, erikti Daryn Ábiljanov úılestirip júr.
Mundaı mektepter búgingi kúnde Almaty, Nur-Sultan jáne Shymkent qalalarynda ashylyp, jumys istep jatqan kórinedi. Bul úrdisten qaraǵandylyq jastar da tys qalmaı, Qaraǵandy medısına ýnıversıtetiniń rektory Raýshan Dosmaǵambetovaǵa oqý ornynyń bazasynda volonter-dárigerler mektebin ashý týraly usynys hat jibergen. Ol jastardyń ıdeıasyn qoldap, kóp uzamaı kenshiler astanasynda eriktiler mektebi paıda boldy. Aldaǵy ýaqytta bul uıym mektep bitirgen eriktilerdi kómekke zárý jandarǵa jiberip otyrmaqshy.
– Mundaı mektep nelikten qajet? Birinshiden, bul alǵashqy medısınalyq kómek kórsetýdi jaqsartady jáne jas medısına qyzmetkerlerin daıarlaý sapasyn arttyrady. Biz kovıd-naýqastardy kútýge kómektesemiz, ıaǵnı medısına qyzmetkerleriniń emosııalyq jáne fızıkalyq júktemesi azaıady. Bizdiń daıyndyǵymyz kez kelgen adamǵa qıyn jaǵdaıda saspaı, kómektesýge septigin tıgizedi, – deıdi Daryn Ábiljanov.
Medısınalyq eriktiler mektebinde bir kýrs aıasynda onlaın-rejimde 15 teorııalyq sabaq jáne 5 oflaın tájirıbelik sabaq ótedi. Tájirıbe alý úshin eriktiler medısınalyq ýnıversıtettiń sımýlıasııalyq jáne bilim berý tehnologııalary ortalyǵyna barady. Munda olar tájirıbeli dárigerlerdiń, oqytýshylardyń kómegimen teorııalyq daǵdylardy meńgeredi.
Qazirdiń ózinde atalǵan mekteptiń tyńdaýshysy bolýǵa 100-den astam erikti jas nıet bildirgen. Anatomııa týraly negizgi bilimi bar stýdentter mamandandyrylǵan kýrstardan ótedi, al medısınalyq bilimi joq eriktilerge indet juqtyrǵan pasıentterge durys kútim jasaý úıretiledi.
Osy ıgi jobanyń jetekshisi Daryn Ábiljanovtyń aıtýynsha, aldaǵy ýaqytta myńnan astam eriktini oqytý josparlanǵan. Bolashaq medık mamandar eki aıǵa sozylatyn kýrsty bitirgennen keıin «Qazaqstan medısına jastary» respýblıkalyq qoǵamdyq uıymynan sertıfıkat alyp, volonterlik jumysqa kirisý múmkindigine ıe bolady.
Qaraǵandy oblysy
