Qazirgi metallýrgııa kombınatynyń alǵashqy irgetasy soǵys jyldarynda qalanǵanymen alypqa laıyq tynys birden bite qoımaǵan edi. 1957 jyldyń aıaǵynda qurylysy shyndap qolǵa alynǵan atalǵan domna peshiniń úsh jyldan soń jumysqa kirisýge daıyn bolyp, shoıyn qorytýǵa ábden jaramdylyǵy dáleldengen sátinen Qazaqstan Magnıtkasy atana bastady. Sodan ataq-dańqy alysqa jańǵyryp, Shyǵystaǵy metallýrgııalyq alypqa aınaldy. Elbasy eńbek joly osynda bastaldy.
Búginde kópke tanymal biraz azamattarǵa shyńdalý mektebi boldy. Osynaý eleýli oqıǵa Temirtaýǵa qala mártebesi berilgenine 65 jyl tolýymen oraılas kelýi de mereke mánin arttyra túsip otyr. Sondyqtan ony laıyqty qarsy alyp, umytylmastaı atap ótýge baılanysty is-sharalar shahar turǵyndarynyń búgindegi mereıli qareketi. Álbette, áýeli beınesiniń odan saıyn ádemilenýine kóńil bólingen. Bizge qala ákimdiginen habarlanǵandaı, daıyndyq jumystary sáýlettik mańyzy bar ǵımarattardy sándendirý, kósheler men aýlalardy ajarlandyrý, joldardy jańartý qyzý júrgizilip jatyr. Metallýrgterdiń mádenıet saraıy, “Jastar” júzý basseıni jóndelý ústinde.
Shoıyn qorytýshylarǵa, bolat balqytýshylarǵa qoıylǵan eskertkish qaıtadan jarqyrap turatyn bolady. Merekege tartý retinde usynylar jańa nysandar da barshylyq. Jergilikti musylman qaýym sol kúni jańa meshit esigin ashady. Jas jubaılardy neke saraıy qarsy alady. 200 búldirshin balabaqshada bas qosady. Halyqaralyq ınvestısııalyq forýmǵa qatysýshylardy bıyl Temirtaýmen arnaıy tanystyrý oblysta osymen úshinshi ret ótpek bul alqaly keńestiń negizgi baǵdarlamasy. Metallýrgııa men qurylys ındýstrııasynyń jetekshi býyndary shoǵyrlanǵan óndiristik ortalyqta sheteldik ınvestorlardy qyzyqtyrarlyq jaǵdaılar az emes. Sondaı-aq “Ken-metallýrgııa jáne kómir óndirý salasyn damytý” kórmesi tanysýshylarǵa tartymdy bolary talassyz. Sonymen kezinde Nura dalasyn dúbirge bólegen bolashaq óndiris alyby jarty ǵasyrlyq beleste. Alǵash shoıyn qorytylǵan №1 domna peshi 50 jyldan keıin osyndaı istiń merekelik rásimine qatysatyndardy kútýde.
Aıqyn NESIPBAI.
TEMIRTAÝ.
