Turǵyndar aldynda esep bergen Qurmanǵazy aýdanynyń ákimi Qaırat Nurtaev málimetine súıensek, atalǵan jobanyń ınvestory – «SevKaspıı FISh» JShS. Bul seriktestik 2 mlrd teńge ınvestısııa salý arqyly balyq qoryn kóbeıtýdi qolǵa alady. Sóıtip, bekire tuqymdas jáne qara balyqtardyń 10 mılıonnan astam shabaǵyn ósirip, Qıǵash ózenine jibermek. Sondaı-aq aýdanda toǵan sharýashylyǵyn damytý qolǵa alynady.
«Bul jobany iske asyrýdyń nátıjesinde 1000-nan asa adam turaqty jumyspen qamtylady dep kútilýde. Budan bólek, balyq, egin, mal jáne qus sharýashylyǵyn damytý maqsatynda Qıǵash ózeninde 243,55 shaqyrymdy quraıtyn janama kanaldardyń túbi tereńdetiledi. Sondaı-aq, 75 shaqyrymdyq «Kobıakovo-Zabýrýne» sýlandyrý júıesin qaıta jańǵyrtý josparlanyp otyr» deıdi aýdan ákimi Qaırat Nurtaev.
