Erli-zaıypty zeınetkerge qaraqshylyq shabýyl jasaý deregi boıynsha is qylmystyq ister jónindegi mamandandyrylǵan aýdanaralyq sotta qaraldy.
«Sot 2020 jyly shilde aıyda O. esimdi sottalýshy kólik satyp alý maqsatynda erli-zaıypty K. jáne A. atty zeınetkerlerdiń páterine zańsyz kirip, olarǵa shabýyl jasap, pyshaqpen qorqytyp, aqsha talap etken. Egde jastaǵy qarııalar qarsylyq kórsetkende, sottalýshy olarǵa birneshe ret pyshaq salǵan. Qarııalar oqıǵa ornynda kóz jumdy. Keıinnen sottalýshy 500 dollar jáne 360 myń teńge men uıaly telefondy urlap ketken», dep habarlady qalalyq sottyń baspasóz qyzmeti.
Sotta prokýror aıyptalýshyny 20 jylǵa bas bostandyǵynan aıyrýdy surasa, jábirlenýshi tarap ókilderi ómir boıyna bas bostandyǵynan aıyrý jazasyn surady. Aıyptalýshy kinásin ishinara moıyndaǵan.
«Sot úkimimen O. eki adamdy óltirgeni jáne qaraqshylyq jasaǵany úshin kináli dep tanylyp, ómir boıyna bas bostandyǵynan aıyrý túrindegi eń qatal jazaǵa kesildi. Qatań jaza sottalýshynyń buryn da qaraqshylyq úshin sottalǵany jáne ol áreketinen sabaq almaǵany úshin taǵaıyndaldy. Kisi qolynan qaza tapqan zeınetkerler 81 jáne 89 jasta bolǵan», dep tolyqtyrdy qalalyq sot. Sot úkimi zańdy kúshine engen joq.
