Elordadaǵy Ulttyq akademııalyq kitaphanada túrkolog-ǵalym, jazýshy, aýdarmashy, Gýmanıtarlyq ǵylymdar akademııasynyń akademıgi, Kúltegin atyndaǵy syılyqtyń laýreaty, Eýropanyń Frans Kafka altyn medaliniń ıegeri Nemat Kelimbetovti eske alý keshi jáne úsh tomdyq shyǵarmalar jınaǵy men shetel tilderinde basylyp shyqqan kitaptarynyń tusaýkeser rásimi bolyp ótti.
Elordadaǵy Ulttyq akademııalyq kitaphanada túrkolog-ǵalym, jazýshy, aýdarmashy, Gýmanıtarlyq ǵylymdar akademııasynyń akademıgi, Kúltegin atyndaǵy syılyqtyń laýreaty, Eýropanyń Frans Kafka altyn medaliniń ıegeri Nemat Kelimbetovti eske alý keshi jáne úsh tomdyq shyǵarmalar jınaǵy men shetel tilderinde basylyp shyqqan kitaptarynyń tusaýkeser rásimi bolyp ótti.
Eń aldymen, ǵumyrynda tap kelgen qıynshylyqty asa zor shydamdylyq pen tózimdilik arqasynda jeńe bilip, artynda ónege qaldyrǵan daraboz daryn Nemat Kelimbetov ǵalymdyq pen jazýshylyqty qosa arqalap, 1974 jyly «Shádi aqyn» atty tuńǵysh zertteýler eńbegin jaryqqa shyǵarsa, odan keıin «Úmit úzgim kelmeıdi» atty hıkaıasyn, «Jarly emespin, zarlymyn» atty povester jınaǵyn, «Qazaq ádebıetiniń ejelgi dáýiri», «Shyǵystyń klassıkalyq poezııasy jáne qazaq ádebıeti», «Ejelgi dáýir ádebıeti» sııaqty kitaptaryn qalyń oqyrmanǵa usyndy.
Ǵalym-jazýshynyń eren eńbegin akademık Seıit Qasqabasov: «Nemat Kelimbetov sonaý 1980 jyldardan bastap ejelgi ádebıetimizdiń tarıhyn úńile de tereńdeı zerttegen aıtýly ǵalym boldy. Ol ádebıetimizdiń erte dáýirin táńirlik jáne ıslamdyq dep eki úlken kezeńge bólip, qazaq saharasynda ıslamǵa deıin de joǵary damyǵan mádenıet bolǵanyn kórsetti» dep túıindese, fılologııa ǵylymdarynyń doktory Qanseıit Ábdezuly: «Nemat aǵamyzdyń ǵylymı eńbekteri men ádebı kitaptarynyń álem tilderi sanalatyn – túrik, qytaı, nemis tilderine aýdarylýy – bul eń aldymen qazaq rýhanııatynyń jemisti jeńisi dep bilemin. Demek, kórnekti jazýshy-dramatýrg, túrkolog-ǵalym Nemat Kelimbetovti qazaq oqyrmany ǵana emes, álem moıyndaǵan qalamger dep baǵalaǵanymyz jón» dep shynaıy baǵasyn bergen bolatyn.
Is-shara barysynda reseılik jazýshy, «Hýdojestvennaıa lıteratýra» baspasynyń dırektory Georgıı Prıahın, senator, Qazaqstan Jazýshylar odaǵynyń tóraǵasy Nurlan Orazalın, Ázerbaıjannan kelgen meımandar Chıngız Alıogly men Elhan Zal Garahanly, Túrkııadaǵy Mımar Sınan ýnıversıtetiniń professory Ábdiýaqap Qara, L.N.Gýmılev atyndaǵy Eýrazııa ulttyq ýnıversıtetiniń rektory Erlan Sydyq, Ádebıet jáne óner ınstıtýtynyń dırektory Ýálıhan Qalıjan, halyqaralyq túrki akademııasynyń prezıdenti Shákir Ybyraev, akademık Ǵarıfolla Esim, jazýshy Smaǵul Elýbaev, fılologııa ǵylymdarynyń doktory Dıqan Qamzabekuly, elshi Baqtııar Tasymov, Nemat Kelimbetovtiń uly Qaırat Kelimbetov jáne basqalar Nemat Kelimbetov jaıly estelikter aıtyp, tusaýy kesilip otyrǵan kitaptar jóninde pikirler bildirip, alyp kelgen syı-syıapattaryn Ulttyq kitaphana men jazýshy urpaqtaryna tabystap, endigi aldaǵy atqarylar is-sharalar týraly óz oı-pikirlerin ortaǵa saldy.
Berik SADYR,
«Egemen Qazaqstan.
