Aldyn ala málimetter boıynsha IQ-353 borty 6:30-da Nur-Sultannan ushyp, Almatyǵa tek 8:12-de qonǵan.
Osy oraıda ushaq bortynda bolǵan jolaýshylardyń biri mán-jaıdy aıtyp berdi.
«Biz otyrdyq. Ushaq Almatyǵa kelip, jolaqpen qozǵalyp bara jatqanda jyldamdyqty ádettegideı tómendete bastady. Biraq bir sátte ol qaıta jyldamdyq aldy, sodan keıin qatty jarylys boldy. Oń jaǵyndaǵy dóńgelek jaryldy. Ushaq temirmen júrdi. Biz qazir tiregish synyp, bárimiz osynda ólemiz dep oıladyq», deıdi jolaýshy.
Onyń aıtýynsha, balalar men áıelder jylaı bastaǵan. Ushaq toqtaǵannan keıin olar ushaqta 30 mınýt otyrǵan. Biraq ile-shala artynan tútin shyqqan.
Sondaı-aq ol oqıǵa ornyna dereý órt sóndirý kóligi kelgenin jáne barlyq jolaýshyny avtobýsqa otyrǵyzyp alyp ketkenin aıtty. Qaza bolǵandar men zardap shekkender joq.
Dál osyǵan uqsas jaǵdaı Qazaq Air kompanııasynyń ushaǵymen de bolǵan. Ushaq 12 aqpanda Nur-Sultannan Shymkentke ushýy tıis edi. Alaıda áýe kemesi usha bastaǵanda shassıi jarylǵan.
«Qazaq Air kompanııasynyń ushaǵymen de solaı boldy. Ol usha bastaǵanda dóńgelegi jarylǵan. Bul týraly sol kúni Shymkentke usha almaı qalǵandar aıtty. Bort burylyp, shuǵyl qonǵan. Qalaı qonǵanyn bilmeımin. Jolaýshylardyń barlyǵy shoshyp júrdi. Olarǵa tamaq pen sý da, turatyn úı de berilmedi. Aıqaı-shý boldy, bireýdiń qysymy kóterilip, jedel járdem keldi. Túni boıy áýejaıda otyrǵan», deıdi er adam.
Búgin, 13 aqpanda Qazaq Air ushaqtarynyń shassıi jarylǵany týraly eki oqıǵa habarlanǵan. Osyǵan baılanysty QR IIDM Avıasııalyq oqıǵalar men ınsıdentterdi tekserý basqarmasy tekserý júrgizetin boldy.
Qazaq Air áýe kompanııasynyń ushaqtarymen bolǵan eki oqıǵa boıynsha aqparat rastaldy. Birinshisi 12 aqpanda, ekinshisi 13 aqpanda bolǵan.
«12 aqpanda Nur-Sultan ýaqytymen saǵat 23:20-da Qazaq Air áýekompanııasynyń Nur-Sultan-Shymkent baǵytyndaǵy QAZ427 reıs ushaǵymen avıasııalyq oqıǵa boldy. Aldyńǵy shassı qaqpaǵynyń jarylýyna baılanysty áýe kemesi 700 metr júrip, ári qaraı ushyp ketpedi. Ushaq turaqqa súırep aparyldy. 13 aqpanda saǵat 08:12-de Nur-Sultan-Almaty baǵytyndaǵy QAZ353 turaqty reısin oryndaǵan Qazaq Air áýekompanııasynyń basqa áýe kemesiniń qonýynan keıin shassıdiń oń tireýiniń eki pnevmatıkasynyń buzylýy anyqtaldy. Ushaqtaǵy barlyq jolaýshylar evakýasııalandy, zardap shekkender joq», delingen AAK habarlamasynda.
