«MÁMS júıesinde tólem jasaǵan árbir azamat qajetine qaraı em ala alady. Sondaı-aq, pasıentter úshin quny qymbat joǵary tehnologııalyq medısınalyq qyzmetter de tegin usynylady. Qazirgi ýaqytta medısınalyq qyzmet eki baǵyt boıynsha kórsetiledi. Ol aldymen tegin medısınalyq kómektiń kepildendirilgen kólemi (TMKKK) aıasynda jáne mindetti áleýmettik medısınalyq saqtandyrý (MÁMS) júıesi», deıdi dırektor.
Dırektordyń aıtýynsha, elordada medısınalyq qyzmettiń sapasy men qoljetimdiligin arttyrý sharalary jalǵasady.
«Bıyl Medısınalyq saqtandyrý qory arqyly Nur-Sultan qalasy boıynsha 107 medısınalyq uıymmen kelisimshart jasaldy. Astanalyqtarǵa MÁMS aıasynda medısınalyq qyzmet kórsetetin bul mekemelerdiń 32-i – memlekettik, 67-si – jekemenshik, 8-i respýblıkalyq medısına uıymy. Onyń ishinde ambýlatorııalyq-emhanalyq kómek kórsetetin uıym – 36, táýlik boıy jumys isteıtin stasıonar – 29, stasıonardy almastyratyn kómek kórsetýshiler – 78 jáne konsýltatıvtik-dıagnostıkalyq kómek kórsetýshi – 12 medısınalyq mekeme bar», deıdi ol.
Odan bólek, fılıal basshysy pasıenttiń medısınalyq saqtandyrýy bolmaǵannyń ózinde tegin medısınalyq kómektiń kepildik berilgen kólemi aıasyndaǵy medısınalyq qyzmetterdi tegin alý múmkindigi baryn aıtty.
