Ulttyq bank aqsha-nesıe saıasaty departamentiniń dırektory Jandos Shaımardanovtyń aıtýynsha, ındekstiń tómendeýi kóbine ónerkásiptegi kórsetkishtiń azaıýyna baılanysty boldy. Ol salada kórsetkish tómendeý aımaǵyna ótip, 49,4-ti quraǵan. (2020 jylǵy jeltoqsanda – 50,3 bolǵan). Qyzmet kórsetý sektorynda da ındekstiń 47,4-ke (2020 jylǵy jeltoqsanda – 48,0) deıin tómendeýi baıqalady. Al qurylystaǵy iskerlik belsendilik ósý aımaǵyna qaıta oralyp, 51,1-di (2020 jylǵy jeltoqsanda – 49,5) qurady.
«О́ńirler boıynsha qańtarda iskerlik belsendiliktiń neǵurlym joǵary deńgeıi Qostanaı (59,6) men Soltústik Qazaqstan (55,1) oblystarynda, anaǵurlym tómen deńgeıi Jambyl (43,1) men Túrkistan (44,7) oblystarynda baıqaldy. Naqty sektor kásiporyndary qańtarda bıznes júrgizýdiń qazirgi jaǵdaıyn jalpy teris baǵalady: oń jáne teris baǵalaý arasyndaǵy jaýaptar balansy (–)2,6 sheginde qaldy. Qazirgi jaǵdaıdyń nasharlaýy, kóbine, suranys pen salyq júktemesiniń áserinen boldy» deıdi Jandos Shaımardanov.
2021 jylǵy qańtarda saýalnamaǵa 456 kásiporyn qatysty: qurylysta – 66, ónerkásipte – 172, qyzmet kórsetýde – 218.
Iskerlik belsendilik ındeksi ekonomıkanyń naqty sektoryndaǵy jaǵdaıdy sıpattaıtyn ozyńqy ındıkator bolyp tabylady. Bul ekonomıkalyq úrdisterdiń dınamıkasyn, bıznes-sıkldiń mańyzdy ózgeris kezeńderin anyqtaýǵa jáne boljaýǵa múmkindik beredi. Iskerlik belsendilik ındeksi Qazaqstan Ulttyq Bankiniń kásiporyndar arasynda aı saıyn ótkizetin saýalnamalarynyń nátıjeleri boıynsha daıyndalady. Saýaldar kásiporyndardyń ekonomıkalyq kórsetkishteri boıynsha oryn alǵan ózgerister men bolashaqtaǵy ózgerisine qatysty aqparattardy qamtıdy.
