Qazyǵurt APB kezekshi bólimine ýchaskelik ınspektorlardan bos jaıylymda bolǵan kókpardy toqtatý kezinde belgisiz bireýlerdiń qarý qoldanǵany týraly habarlama kelip tústi.
Atalǵan jaıtty Qazyǵurt polıseıleri tirkep, jedel-izdestirý sharalaryna kiristi. Jedel júrgizilgen arnaıy operasııa nátıjesinde Túrkistan oblysy PD krımınaldyq polısııa basqarmasynyń qyzmetkerleri Túrkistan oblysy UQKD jáne QR Ulttyq ulanynyń «Búrkit» arnaıy jasaǵymen birlesip, Qazyǵurt kenti kósheleriniń birinde «VAZ» markaly avtokólikti toqtatyp, 4 kúdiktini ustady. Ustalǵan Qazyǵurt aýdanynyń 4 jas turǵyny polısııa bólimine jetkizildi.
Kúdiktilerdi tintý kezinde polıseıler sómkeni taýyp alyp, odan zattaı dálel retinde 16 kalıbrli sholaq myltyq pen oq-dárilerdi tárkiledi. Jedel ýákilder kúdiktilerdiń úıin odan ári tintý kezinde qosymsha 16 kalıbrli ańshylyq myltyq pen eki travmatıkalyq tapanshany tapty.
Qazirgi ýaqytta atalǵan jaıt boıynsha QR QK 293 jáne 287 baptary boıynsha sotqa deıingi tergeý amaldary júrgizilýde. Jastar qamaýǵa alyndy. Polısııa qyzmetkerleri kúdiktilerdiń basqa da qylmystarǵa qatysy bar-joǵyn tekserip, qarýdyń qaıdan alynǵanyn anyqtap jatyr.
