Hokkeı • 17 Aqpan, 2021

Pleı-offta qaı qarsylasqa tap bolady?

14 ret kórsetildi

Qurlyqtyq hokkeı lıgasynda (QHL) baq synap jatqan elordanyń «Barysy» keshe turaqty birinshiliktegi sońǵy alty oıynynyń birin ótkizdi. Buǵan deıin pleı-off kezeńiniń joldamasyn ıelenip qoıǵan qazaqstandyq klýbtyń Gagarın kýbogy jolyndaǵy jarysta qaı komanda qarsylasy bolatyny dál osy oıyndarǵa baılanysty bolmaq.

Qazirgi tańda jerlesterimiz birinshiliktiń «Shyǵys» konferensııasynda 54 oıynnan keıin 62 upaı jınap, se­gizinshi orynda keledi. Matematıkalyq esep boıynsha, «Barys» týrnır kestesinde besinshi orynǵa deıin kó­te­ri­lýine múmkindik bar. О́ıtkeni «Barystyń» aldyn­da tur­ǵan «Avtomobılıstiń» enshisinde 63 upaı (7-oryn), «Tor­pedo» (6-oryn) men «Traktorda» 65-upaıdan (5-oryn) bar.

Elorda klýby endi aldaǵy bes oıynnyń ekeýin, ıaǵnı «Avtomobılıst» (18 aqpan) pen «Sıbır» (21 aqpan) klýbtaryn Nur-Sultanda, al «Ak Bars» (23 aqpan), «Kýnlýn» (25 aqpan) jáne «Avangard» (27 aqpan) komandalarymen syrt aıdynda baq synasady. Bul jerde «Barysqa» «Sıbır» jáne «Ak Bars» ujymymen ótetin oıynda upaı alý qıynǵa soǵýy múmkin. Jalpy qalǵan qarsylastar da jerlesterimizge eki upaıdy ońaı ustata salmaıtyny anyq, degenmen bıylǵy maýsymda «Barys» joǵaryda aty atalǵan eki komandaǵa shamasy kelmedi. Máselen, osy jyly «Sıbırmen» úsh márte muzaıdynda jolyǵyp, sonyń ekeýinde 3:1 esebimen ese jiberse, 5 aqpanda Sibirde ótken básekede jerlesterimizdiń baǵy jandy. Bul qazaqstandyq komandanyń jeti oıynǵa sozylǵan jeńilis serııasynan keıingi birinshi jeńisi edi.

Al Gagarın kýbogynyń úsh dúrkin jeńimpazy Qazan­nyń «Ak Bars» ujymymen Qazaqstannyń «Barysy» bıylǵy turaqty birinshilikte úsh ret kezdesip, sonyń tek bireýinde ǵana jeńis toıyn toılady. Jalpy kez kelgen klýb úshin «Ak Barsty» jeńý mártebe sanalady. 2008 jyldan beri eki klýb muzaıdynda 39 márte jolyǵyp, sonyń tek jeteýinde ǵana jerlesterimiz jeńiske jetken eken. Al qalǵan 32 oıynda qazandyqtar basym túsken. Iаǵnı «Barys» ár bes oıynda qarsylasynan upaı alyp otyrǵan. Bizdiń jigitter sońǵy ret 2020 jyldyń 16 qazanynda «Tatneft-Arenada» ótken oıynda aıdyn ıelerin overtaımda tize búktirgen. Negizgi kezeńde hokkeıshiler bir-biriniń qaqpasynan sańylaý taba almaǵan soń, jeńimpaz komandanyń esimi qosymsha ýaqytta anyqtaldy. Darren Dısten tamasha pas alǵan Roman Starchenko qarsylastyń qaqpasyn dál kózdep, «Barysqa» jeńis syılaǵan edi.

«Avtomobılıspen» ótken keıingi bes oıynnyń úsheý­in­de elorda klýby basym túsken. Ekate­rın­býrg komandasy «Baryspen» bir deńgeıde dep te aıtýǵa bolady. Demek aldaǵy oıynda da jerlesterimiz eki upaıǵa qol jet­kizedi dep oılaımyz. Qazir eki ujym arasyn bir-aq upaı bólip turǵanyn eskersek, bul match óte tartysty ótpek. Jeńilistiń eki komandaǵa da aýyr soǵatyny anyq. О́ıt­keni týrnır kestesinde 8-oryn alǵan komanda pleı-off erejesi boıynsha alǵashqy kezeńde kósh basynda turǵan komandamen kezdesedi. Al kósh basynda 86 upaı jınaǵan «Ak Bars» keledi. 77 upaımen ekinshi orynda turǵan «Avangard» Qazan klýbyn qýyp jete almaıdy.

Qytaıdyń «Kýnlýn» ujymy áldeqashan pleı-off kezeńinen úmit úzgen. Týrnır kestesinde sońǵy orynda kele jatqan qytaılyqtar aldaǵy oıyndarda endi tek jan­kúıerler úshin oınaıtyny aıtpasa da túsinikti. Eki klýb arasyndaǵy bıylǵy maýsymdaǵy úsh oıynda da jerles­terimizdiń mereıi ústem bolǵan. Bul oıyn syrt aıdynda ótetin bolǵandyqtan, «Barysqa» ońaı soqpaıtyny belgili.

Jerlesterimiz turaqty birinshiliktiń sońǵy oıynyn qonaqta Ombynyń «Avangardymen» ótkizedi. Qazir ombylyqtardyń qarqyny kúshti. QHL-daǵy keıingi bes oıynnyń tórteýinde qarsylastarynan iri eseppen aılasyn asyrǵan. О́tken jyly komandalar eki ret muzaıdynda jolyǵyp, bir-birden jeńiske jetken. 13 qarashada elordada ótken oıynda «Avangard» 5:1 esebimen basym túsken bolsa, 23 jeltoqsanda Ombyda uıymdastyrylǵan match­ta jerlesterimizdiń aıy ońynan týdy. 3:1 esebimen aıaqtalǵan oıynda Roman Starchenko, Iаkob Lılıa jáne Fıl Varone mergendigimen kózge túsken-di. Bálkim, «Avangard» pen «Barys» arasyndaǵy úshinshi kezdesý kim myqty ekenin anyqtap qana qoımaı, pleı-offta qaı klýb kimmen kezdesetinin de anyqtap berýi múmkin. Sebebi, kóp jaǵdaıda barlyq nátıjeni sońǵy týrdyń oıyndary sheship jatatyny belgili.

Osy maýsymdy qosa eseptegende «Barys» QHL-dyń pleı-off satysyna osymen 13 márte shyǵyp otyr. Biraq jerlesterimiz ekinshi kezeńnen asa alǵan emes. «Barys» aldaǵy básekelerin sátti ótkizse, pleı-offtyń birinshi kezeńinde «Avangard», «Metallýrg» nemese «Salavat Iýlaevqa» qarsylas atanbaq. Al eger 5 oıynda qajetti upaıyna qol jetkize almasa, onda azýly «Ak Barsqa» tap bolady.

Sońǵy jańalyqtar

Almaty qalasynda jer silkindi

Aımaqtar • Keshe

Uqsas jańalyqtar