Byltyr óńirde «Eńbek» memlekettik baǵdarlamasynyń is-sharalaryn iske asyrýǵa 8,1 mlrd. teńge bólindi. Baǵdarlamanyń birinshi baǵyty boıynsha kásiptik oqytýǵa 1486 adam jiberilgen.
«2020 jyly oblysta barlyǵy 38 myńnan astam adam jumyspen qamtyldy. 32 myń jumys orny ashyldy. Onyń ishinde 14 myń adam jumyspen qamtý jol kartasy jobalary arqyly jumys tapty. Negizi «Eńbek» baǵdarlamasy tabysy az, kópbalaly analardy bızneske tartýǵa basymdyq berip otyr. Halyqtyń osy sanattary úshin nesıe berýdiń jeńildetilgen sharttary qarastyrylǵan.
2021 jyly halyqty nátıjeli jumyspen qamtýǵa tartý jónindegi is-sharalar jalǵasady. 18 myń jańa jumys ornyn ashý josparlanýda. Bul maqsatta 9,1 mlrd teńge bólý kózdelgen», deıdi oblys ákimi.
Oblysta eńbek resýrstarynyń utqyrlyǵy aıasynda keshendi jumys júrgizilýde. О́tken jyly óńirlik kvotaǵa 739 adam engizilgen, onyń 187-si oralman bolsa, qalǵandary ońtústik oblystardan keldi. Qazir barlyq azamattarmen áleýmettik kelisimsharttar jasaldy, kóship keletinderge sýbsıdııalar daıyndaldy.
Aıta keteıik, búgin Qostanaı oblysynyń ákimi Arhımed Muhambetov turǵyndarǵa esep berdi.
