Mádenıet jáne sport mınıstri Aqtoty Raıymqulovanyń moderatorlyǵymen ótken sharada alǵashqy baıandamany vıse-mınıstr Nurǵısa Dáýeshov jasady. Ol 2020 jylǵy pandemııa kezindegi tótenshe jaǵdaı men shekteý sharalaryna qaramastan birde-bir memlekettik uıym óz qyzmetin toqtatpaǵanyn aıtty. «Jyl basynan bastap memlekettik mádenıet uıymdary spektakl premeralary, kórmeler, konsertter men konferensııalar syndy 500-ge jýyq is-shara ótkizdi. 16 naýryzdan bastap sala tolyǵymen onlaın jumys formatyna kóshti», degen vıse-mınıstr mádenıet salasyna eń kóp qarajat bólgen úsh óńirdi de atap ótti. «2020 jyly óńirlerdiń jalpy bıýdjetinen mádenıet salasyna bólingen qarajattyń paıyzdyq úlesin shyǵardyq. Mádenıet salasyna bólingen qarajat kólemi jaǵynan aldyńǵy qatarlarda Almaty (5,6%), Qaraǵandy (3,6%), Aqmola oblystary (3,1%) tur», dedi.
Alqa májilisinde qazaq tilin ǵylym tiline aınaldyrýǵa baǵyttalǵan ǵylymı-lıngvıstıkalyq baza qurylatyny málimdeldi. Sondaı-aq elimizdegi til saıasatyn iske asyrýdyń 2020-2025 jyldarǵa arnalǵan memlekettik baǵdarlamasyna ózgerister engiziletin bolady. Atap aıtsaq, «Abaı ınstıtýty» atty Qazaqstan men shetelderde qazaq tilin úıretý baǵdarlamasyn jetildirip, qoldanys aıasyn keńeıtý josparlanyp otyr. Sonymen qatar vıse-mınıstr N.Dáýeshev el azamattarynyń aty-jónderin latyn negizdi álipbımen jazý erejeleri ázirlenetinin málimdedi. «Qazaqstan Respýblıkasynyń aýmaǵyndaǵy geografııalyq nysandardyń jáne olardyń quramdas bólikteriniń ataýy latyn grafıkasy negizinde standarttalady», dedi ol.
El Táýelsizdiginiń 30 jyldyǵyn merekeleý jónindegi jalpy respýblıkalyq is-sharalar jospary bekitildi. Bul týraly alqa otyrysynda Mádenıet jáne sport mınıstri Aqtoty Raıymqulova málimdedi. «Táýelsizdiktiń 30 jyldyǵyn merekeleý jónindegi jalpy respýblıkalyq is-sharalar jospary bekitildi. Memleket basshysy Táýelsizdiktiń 30 jyldyǵyn merekeleý kezinde ysyrapshyldyqqa jol bermeý kerektigin, árbir is-shara elge paıda ákeletin naqty qadamdarmen baılanysty bolýy tıis ekenin atap ótkenin bilesizder. Osyǵan baılanysty, merekeleýge ıdeologııalyq turǵydan kelýimiz kerek. Mereıtoılyq is-sharalardy mádenıet, arhıv, sport jáne týrızm ınfraqurylymyn damytýǵa baǵyttaǵanymyz jón. Jospardyń is-sharalary ulttyq mádenıetti ilgeriletýge, salt-dástúrdi jandandyrýǵa, salamatty ómir saltyn nasıhattaýǵa, buqaralyq sportty, onyń ishinde ulttyq sport túrlerin damytýǵa baǵdarlanýy tıis», dedi ol. Sondaı-aq mınıstr ulttyń «ıdeologııalyq ımmýnıtetin» qalyptastyratyn jobalar ázirlenetinin hám mádenıet salasyndaǵy onlaın-jobalar jalǵasatynyn jetkizdi. Onyń aıtýynsha, sala boıynsha 2020 jyl nátıjeli bolyp, oń jetistikter jıi oryn aldy. «Byltyrǵy negizgi sharalardyń tiziminde Memleket basshysynyń tapsyrmasy boıynsha áleýmettik qoldaý sharalary qabyldandy. Bul jalaqyny arttyrý, arnaıy aı saıynǵy aqshalaı tólemder, qosymsha júkteme úshin qosymsha aqylar belgileý, shyǵarma avtorlaryna qalamaqy tóleý, qyzmetkerlerdiń turǵyn úı jaǵdaılaryn jaqsartý jáne taǵy basqa sharalar. Memleket pandemııa kezeńinde memlekettik mádenıet, arhıv jáne sport uıymdaryn, mádenıet, óner jáne sport salasyndaǵy bilim berý mekemelerin tolyq kólemde qarjylandyrýdy toqtatpaǵanyn erekshe atap ótkim keledi», dedi.
Al 2021 jyly kınematografııa salasyna bólinetin qarajattyń 70 paıyzy tarıhı, patrıottyq kartınalarǵa baǵyttalmaq. Qalǵan 30% qarjy jeke kınojobalar men jas talanttardyń debıýttik fılmderin qoldaýǵa jumsalady. Sonymen qatar, mınıstrlik Memleket basshysynyń tapsyrmasyn iske asyrý maqsatynda jaqyn arada Sháken Aımanov atyndaǵy «Qazaqfılm» AQ modernızasııasyn sapaly júzege asyrýdy kózdep otyr.
Alqa otyrysynyń qorytyndysy boıynsha Premer-Mınıstrdiń orynbasary Eraly Toǵjanov mınıstrlikke dúnıege táýelsiz kózben qaraıtyn ádebıet pen ónerdi qalyptastyrýǵa baǵyttalǵan «El rýhy» ulttyq jobasyn ázirleýdi qolǵa alýdy tapsyrdy. «Mádenıet salasyn damytýda zamanaýı trendterdi basshylyqqa alý mańyzdy. Iаǵnı mádenıet, sport, týrızm, arhıv salalary tolyqtaı sıfrlandyrýǵa kóshý kerek. Máselen, respýblıkadaǵy barlyq kitaphanalardyń 48 paıyzy ǵana ınternetpen qamtylǵan. Al arhıv salasyn sıfrlandyrý – kezek kúttirmeıtin másele. Sondyqtan, mádenıet jáne sport salalaryn kezeń-kezeńimen sıfrlandyrýdyń jol kartasyn daıyndaýdy tapsyramyn. Mádenıet salasy árqashan memleket qoldaýynda bolatyny belgili. Osy rette mádenıet salasyn kommersııalandyrýdy oılastyrý qajet. Bul halyqaralyq tájirıbede bar úrdis», deı kele atalǵan jobalardyń júıeli túrde oryndalýyn atap ótti.
Budan bólek týrızm jáne arhıv salasyndaǵy atqarylǵan jumystar jaıly vıse-mınıstr Ǵabıdolla Ábdirahymov baıandasa, sport salasy boıynsha vıse-mınıstr Sáken Musaıbekov esep berdi. Sondaı-aq «Qazaqstandyq salalyq mádenıet, sport, týrızm jáne aqparat qyzmetkerleriniń kásiptik odaǵy» qoǵamdyq birlestiginiń tóraǵasy Svetlana Imanqulova Atyraý oblysynda birde-bir sport-ınternat mektebi joq ekenin aıtyp, qajetti sharalar qoldanylýyn surady.
