Kitap tusaýkeserinde Sapar Baıjanovtyń kózin kórgen, qyzmettes bolǵan áriptesteri Saırash Ábishqyzy, Jumagúl Soltıeva, Janat Elshibek, Saýytbek Ábdirahmanov, Sultan Orazalın, Serik Negimov jáne jary Kúlásh Beısenbiqyzy qatysty. Jıyn barysynda qalamgerdiń ózi basqarǵan gazetke qosqan eleýli eńbegi men ustazdyq ulaǵaty, tálim-tárbıesi erekshe atalyp ótti.
Jıynda bas basylym basshysy Darhan Qydyráli kitap mazmunyn, kósemsóz sheberiniń adamgershilik qasıeti men rýhanı bolmysyn erekshe iltıpatpen áńgimeledi.
«О́zderińiz bilesizder, gazetimizde jyldardyń jańǵyryǵyndaı jaqsylardyń sózin, ozyq maqalalardy, kóne qujattardy kitap etip bastyrý, sıfrly formatqa kóshirý syndy jaqsy dástúr bar. Mysaly, Sherhan Murtazanyń «Namys naızaǵaıy», Ábish Kekilbaevtyń «Dáýir daýysy» jaryq kórip oqyrman ıgiligine aınaldy. О́tken jyly Sapar Baıjanovtyń «Arhıv-Aımaq» kitaby jaryq kórdi. Karantın jaǵdaıyna baılanysty dál ýaqytynda kitaptyń tusaýkeserin jasaı almadyq. Kitaptyń tanystyrylymyn ótkizýdiń sáti endi túsip, reti búginge kelip tur eken», dedi ol.
Budan soń, Sultan Orazalın, Saýytbek Ábdirahmanov, Kúlásh Beısenbiqyzy jáne Darhan Qydyráli saltanatty túrde kitaptyń lentasyn qıdy.
Ári qaraı Kúlásh Beısenbiqyzyna «Egemen Qazaqstan» gazetiniń 100 jyldyq mereıtoıǵa arnaıy daıyndalǵan tósbelgisi tabys etildi.
Jıyn sońynda tusaýkeserge jınalǵan qaýym Sapar Baıjanovtyń ómiri men shyǵarmashylyǵyndaǵy sátterdi sóz etip, qalamger jaıynda túrli estelikterin aıtty.
Aıta keteıik, jazýshy, Qazaqstannyń eńbek sińirgen qaıratkeri, Halyqtar dostyǵy ordeniniń ıegeri Sapar Baıjanov 1973-1983 jyldar aralyǵynda «Egemen Qazaqstan» gazetin basqardy. О́tken jyly qalamgerdiń 90 jyldyq mereıtoıy aıasynda jer-jerde mádenı is-sharalar men konferensııalar ótken edi.
