Atyraý oblysynyń áýejaıynda 80 jolaýshy sergeldeńge tústi. Bul týraly «24 kz» habarlady.
Bek Air áýe kompanııasynyń ushaǵy Atyraýdan Almaty qalasyna tańǵy saǵat 10-da ushýy tıis bolatyn. Alaıda, belgilengen merzimde ushaq kókke kóterilmegen. Munyń sebebin jergilikti áýe kompanııasy jolaýshylarǵa túsindirmegen de eken. Shydamy taýsylǵandardyń birsypyrasy úılerine ketip qalypty. «Men ne isterimdi bilmeı turmyn. Aqsham da qalmady. Jolaýshylardyń arasynda erteń Almaty arqyly Reseı, О́zbekstan men Qytaı eline ushatyn azamattar da bar»,-deıdi Altyn Zııabdınova.
Qazir barar jeri joq jolaýshylar áýejaıda ushaqty sarǵaıa kútip otyr. Aralarynda búldirshinder de bar eken. Aqshasy barlary qymbat reısterge bılet satyp alǵan kórinedi. Jolaýshylardyń aıtýy boıynsha, áýe kompanııasy osy ýaqytqa deıin olarǵa medısınalyq kómek kórsetpegen.
Bizge kelip túsken sońǵy aqparatta áýe kompanııasynyń tańǵa deıin jolaýshylarǵa jatyn taýyp berýge ýáde bergeni jazylǵan. Biraq, ondaǵy daý-damaıdyń ázirge basylar túri joq.
Baqytbek Keneshuly.
Derekkóz: «24 kz».
Foto: Wikipedia.org
