Ortalyqta 50 qyzmetker jumys isteıdi, olar halyqqa táýlik boıy konsýltasııalyq kómek kórsetedi. Ortalyq dárigerleri koronavırýsty emdeý máseleleri boıynsha beıne keńes beredi. Kúnine 1200-1500 shyǵys jáne kiris qońyraýlary pysyqtalady.
«Eger bizge habarlasqan adamnyń koronavırýstyq ınfeksııaǵa tán belgileri úshten kóp bolsa, biz olardy saralaımyz, tólqujat málimetterin jınaımyz. Keıin aýmaqtylyǵy boıynsha tekserý jáne PTR-testileý júrgizetin mobıldi brıgadany jiberemiz. Nátıjesi oń bolyp shyqqan jaǵdaıda mamandar tekseredi jáne aýrýhanaǵa jatqyzý nemese ambýlatorlyq deńgeıde emdeý máselesi sheshiledi. Oqshaýlanatyndaı jaǵdaıy bolmasa, ınfeksııalyq stasıonarǵa jatqyzylady, al eger múmkindigi bolsa, adam 14 kúnge oqshaýlanady, onyń barysynda ol bizde qaralady. Bizde emhanalarǵa portal quryldy, onda bizge pasıentter týraly, olardyń qansha ýaqyt úı karantıninde ekendigi týraly barlyq derekter jiberiledi», dedi Ortalyqtyń bas menedjeri Juldyz Baýyrjanqyzy.
Aýmaqtyq emhanalardyń dárigerleri pasıentterdi tekserip, em taǵaıyndaıdy. Ortalyq qyzmetkerleri osy pasıentterdiń jaǵdaıyna baqylaý júrgizedi. Úı stasıonaryndaǵy pasıentterdiń jaǵdaıy nasharlaǵan kezde olar dereý aýrýhanaǵa jatqyzylady. COVID-19 rastalǵan jaǵdaılary bar pasıentter aýrýhanaǵa jatqyzylǵannan keıin de mamandardyń baqylaýynda bolady.
Bul ortalyqtyń taǵy bir fýnksııasy - pasıentterdiń karantın rejımin saqtaýyn baqylaý. Ortalyq qyzmetkerleri pasıentterge únemi beıne qońyraý shalyp turady, olardyń emdelýin jáne úılerinen shyqpaýyn baqylaıdy. Bul jumys baqylaýda turǵan pasıentter arasynda karantındik rejımniń buzylýyn jedel anyqtaýǵa múmkindik beredi.
Búgingi tańda ortalyq mamandarynyń baqylaýynda 587 adam bar. Ashylǵannan beri barlyǵy 5 383 naýqas baqylaýda boldy. Búgingi kúnge deıin ortalyq 14 349 kiris jáne 73 347 shyǵys qońyraýlaryna qyzmet kórsetti.
