Qazaqstannyń barlyq óńirlerinde jergilikti áskerı basqarý organdarynyń qoldaýymen kolledj ókilderi kezdesýler ótkizedi, onda oqý ornyna qabyldaý erejeleri men tártibi túsindiriledi.
1996 jyldan bastap oqý orny respýblıkanyń Qarýly Kúshteri men basqa da kúshtik qurylymdarynda sátti qyzmet atqaryp júrgen 3000-den astam kásibı serjantty daıyndady. Jyl saıyn orta eseppen bir jarym myń jas kolledjge túsýge úmitker bolady. О́tken jyly 240-tan astam adam kadet atandy.
Kolledjde oqý tegin, sondaı-aq kadetter turatyn orynmen, tamaqtaný jáne zattaı múlikpen qamsyzdandyrylady. Oqý merzimi – bir jyl on aı.
Kolledjge túsýge nıet bildirgen azamattar oqýǵa túser jyly 17 jasqa tolyp, 22 jastan aspaýy kerek. Merzimdi áskerı qyzmetin ótkergen jáne kelisimshartpen áskerı qyzmettegilerdi 24 jasqa deıin qabyldaıdy.
– Bul oqý orny áskerge kásibı serjanttar daıyndaıdy. Oqýǵa túsý kezinde attestattyń ortasha baly esepke alynady, ol keminde úsh dep baǵalanýy tıis. Sondaı-aq medısınalyq kýálandyrýdan ótý, dene daıyndyǵy boıynsha normatıvterdi tapsyrý, psıhologııalyq testileý qajet. Kolledjdi bitirgen túlek áskerı mamandyq alyp, júz paıyz kepildikpen jumysqa ornalasa alady, - dep túsindirdi kolledj ókili úshinshi synypty serjant Erkebulan Serikbaev.
Oqý prosesinde árbir kadetpen Qarýly Kúshterde serjanttar quramy laýazymdarynda áskerı qyzmet ótkerý týraly kelisimshart jasalady. Kadetter áskerı bólimderde bólimshe komanjdırleri laýazymdarynan bastap, Qarýly Kúshterdiń bas serjantyna deıin mansaptyq jolmen óse alady.
-Men úshin bul sapaly bilim alý múmkindigi. Kolledj oqytýshylaryna jeke suraq qoıyp, sóılese alatynymyzdy aıtqan kezde qatty qýandym. Kezdesý áskerı qyzmetke, el ıgiligi úshin qyzmet etýge degen nıetimdi nyǵaıtty, – dedi Erasyl Nurlanuly.
Áskerı kolledj Shýchınsk qalasynda ornalasqan. Onyń ǵımarattary men joǵary sanatty oqytýshylar quramy bar. Dıplomnan bólek kadetter úshinshi synypty BMP mehanık-júrgizýshisi jáne «V», «S» sanatyndaǵy avtomobıl júrgizýshisi kýáligin alady.
Oqýǵa túsý úshin turǵylyqty jeri boıynsha jergilikti áskerı basqarý organdaryna júginý qajet.
