Aımaqtar • 24 Aqpan, 2021

Batys Qazaqstanda 1549 abonent jaryqsyz qaldy

13 ret kórsetildi

Aqpannyń 23-24-i kúnderi Batys Qazaqstan oblysynda qatty boran soǵyp, turǵyndarǵa kóptegen qolaısyzdyq keltirdi. Bul kúnderi ásirese tótenshe jaǵdaı qyzmetkerleri tynym tappady, dep habarlaıdy Egemen.kz

Uıytqyǵan borannan 50 qadamnan arǵy jer kórinbeı, kúnniń sýyqtyǵy mınýs 27 gradýsqa jetken. Aýa raıynyń qolaısyzdyǵyna baılanysty oblys aýmaǵyndaǵy Samara-Shymkent, Atyraý-Oral, Podstepnoe-Federovka-RF shekarasy, Oral-Tasqala-RF shekarasy, Chapaev-Jalpaqtal-Qaztalov-RF shekarasy respýblıkalyq joldary, Tasqala-Aqqýraı-Bolashaq-RF shekarasy, Úlken Shaǵan-Peremetnoe, Oral-Kırsanov oblystyq joldary jabyldy. Respýblıkalyq joldarda júk jáne qoǵamdyq kólikterdiń qozǵalysyna shekteý qoıyldy.

– Osy bir táýlikten sál asatyn ýaqyt ishinde bizdiń qutqarýshylar 63 adamdy qıyn jaǵdaıdan alyp shyqty, onyń ishinde kámeletke tolmaǵan 7 bala bar, – deıdi Batys Qazaqstan oblysy Tótenshe jaǵdaılar departamenti bastyǵynyń birinshi orynbasary podpolkovnık Arman Toqanov.

Tasqala jáne Aqjaıyq aýdanyndaǵy jylytý beketterine 16 jolaýshy kelip panalaǵan, onyń úsheýi – jas bala.

Saratov-Oral tas jolynyń boıynda, Tasqala aýdany, Mereı aýylynyń tusynda jolda qalǵan VAZ-2114 markili avtokóliginen 24 jasar azamat túngi saǵat 3.30.-da qutqarylyp, jylytý beketine jetkizilgen. Sol kúni tańerteń Tasqala aýdany, Birlik aýyly tusynda qalǵan Mıtsýbısı avtokóliginen de eki azamatty tótenshelikter qutqaryp, qaýipsiz jerge jetkizgen. Al Aqjaıyq aýdany, Kóneketken aýylynyń tusynda Gazel avtokóligimen dalada qalǵan azamatty jedel-qutqarý jasaǵynyń №6 qutqarý bólimshesi qyzmetkerleri alyp shyqqan.

Arman Qumarulynyń aıtýynsha, qutqarý jumystarynda tótenshelikterdiń 31 qyzmetkeri, 13 kóligi kezekshilikte júr.

Qatty jel elektr jelilerine de nuqsan keltirip, oblystyń 5 aýdanynda keıbir eldimekender, 1,5 myńnan asa úı jaryqsyz qalǵan. Sonyń ishinde Báıterek aýdany boıynsha 900 abonent, Qaztalov aýdanynda – 77, Aqjaıyqta – 450, Jańaqalada – 96, Terekti aýdanynda – 26 abonent qysqa tuıyqtalý s ebebinen elektr qýatynsyz qalǵan eken.

 

Sońǵy jańalyqtar

ShQO-da mal urylary ustaldy

Aımaqtar • Búgin, 11:00

Uqsas jańalyqtar