Aımaqtar • 24 Aqpan, 2021

Aq borannyń azaptary

69 ret kórsetildi

SQO-da aqpannyń sońǵy kúnderi aqyryp ketti. Keshe qara boran túni boıy dúrildep, ókirdi de turdy. Tańerteń tursaq qardy da úıip tastapty, qalanyń shetki kósheleri túgil ortalyq kósheleriniń ózin basyp qalyp, avtomashınalar zorǵa qozǵalyp jatty. Búgin kúni boıy júzden artyq qar tazalaý tehnıkalary bir tynbaı jumys istedi.  

Polısııa qyzmetkerleri kúsheıtilgen rejimde jumys istedi. Qar keptelisternen apattardy boldyrmaý jáne adamdardyń úsip qalmaýy úshin barlyq baǵyttardaǵy avtojoldar men trassalar baqylaýǵa alyndy. Jol qyzmetteri borannan túk kórinbeıtin jaǵdaıda adamdar men batyp qalǵan tehnıkalardy qutqarý operasııalaryn júrgizdi.

Taıynsha aýdany Teńdik aýylynyń bir turǵyny «Nıva» avtokóligimen aýdan ortalyǵyndaǵy aýrýhanaǵa úsh jasar qyzyn apara jatqan. Salonynda jeti jasar balasy da bolǵan. Mashınasy Taıynshadan 6 shaqyrym jerde batyp qalyp, er adam «102» telefonyna habarlasady. Polıseıler medısına qyzmetkerlerin eskertip, aýdan kásipkerlerinen kómek suraıdy. Aýa raıynyń qolaısyzdyǵynan arnaıy tehnıkanyń ózi ázer jumys istedi. Úsh tehnıkanyń bireýi kıývetke ketip, ekinshisi synyp qalǵan. Úshinshisi batyp turǵan «Nıva» avtomashınasyna qaraı «jedel járdem» kóligine jol ashyp, úsh jasar qyzdy aýrýhanaǵa jetkizýge múmkindik berdi.

Osy aýdan polısııa bóliminiń jeke quramy men turǵyndary joǵalyp ketken jylqyshyny izdeýge jumyldyryldy. Jylqyshy áıeline habarlasyp, óziniń qaı jerde júrgenin bilmeıtindigin aıtqan. Jalǵyz-aq belgi -  qamystardyń bolýy. Ony jergilikti JShS-niń tórt traktorymen izdegen. Kóp uzamaı jylqyshy tabyldy degen habar keldi. Astyndaǵy esti at izdeý tehnıkasynyń izine túsip, ıesin úıine jetkizipti.

Aqqaıyń aýdanynda da bir bir jylqyshy adasyp, ony ýchaskelik ınspektor men jergilikti turǵyndar traktormen, qarda júrgish tehnıkamen izdep, zorǵa tapty.  Al Esil aýdanynyń tártip saqshylary, qutqarýshylar men aýyldyqtar salt atpen ketip, úıine oralmaǵan 17 jasar jigitti izdedi. Áıteýir ony jergilikti turǵyndar Aleksandr Metrınskıı men qarda júrgish tehnıkada birge bolǵan Ádilbek Bolatov tapty.

Salonynda 9 adam, onyń ishinde bir bala bar úsh avtokólik Jambyl aýdanyndaǵy Rojdestvenka aýylynan 3 shaqyrym jerdegi jergilikti mańyzy bar avtojolda qar qursaýynda qalǵan. Olardy aýdandyq polısııa bóliminiń bastyǵy Asan Meıramov bastaǵan polıseıler men «Stroıtrest 17» JShS qyzmetkerleri qutqardy. 5 saǵattyq izdeýdiń nátıjesinde adamdardy evakýasııalap, jylytý pýnktine jetkizdi. Dál sol kúni aýdan polıseıleri ishinde jolaýshylary bar synyp qalǵan «VAZ 2110» avtomashınasyn súırep shyǵarǵan. Qas qaraıǵan kezde Áıimjan jáne Presnovka aýyldarynyń ortasynda eki jeńil kólik turyp qalǵan. Júrgizýshiler men jolaýshylar jylytý pýnktine jetkizildi, olar túneý ornymen jáne ystyq tamaqpen qamtamasyz etildi.

Mamlıýt aýdanynda qar qursaýynan «DAF» júk kóligin súırep shyǵarý qajet boldy. Taǵy 48 júk kóligi jáne 5 jeńil kólik aýdan ortalyǵy Mamlıýtkadaǵy «Chelıabi-Novosibir» tas joly boıyndaǵy turaqpen qamtamasyz etildi. Aýdan ákimi Vladıslav Lýkın, aýdan prokýrory Samat Tólegenov, aýdandyq PB jáne TJ basshylary júrgizýshiler men jolaýshylardyń qaýipsizdigin jáne olardy ornalastyrýdy, mamlıýttikterdi turǵylyqty mekenjaılaryna jetkizýdi uıymdastyrýmen jeke aınalysty.

«Aýa raıynyń qolaısyzdyǵynan barlyq jol qyzmetteri barynsha yjdahatty jumys isteýde. Respýblıkalyq mańyzy bar avtojolardaǵy júrgizýshiler ystyq tamaq ishetin jáne jylynatyn oryndarda 136 mashına tynystady. Trassalardy jáne oblys ortalyǵyndaǵy jol jelilerin qardan tazalaý jumysy kúsheıtilgen rejimde júrgizilýde. Petropavldyq avtokólik ıelerine qazirgi jaǵdaıǵa túsinistikpen qarap, kommýnaldyq qyzmetterge joldardy qardan tazartýǵa kedergi keltirmeıtindeı, jol jıegine qoıylǵan kólikterin alý qajettiligin eskertemiz», - deıdi PD bastyǵy polısııa polkovnıgi Marat Tólebaev.

Sońǵy jańalyqtar

ShQO-da mal urylary ustaldy

Aımaqtar • Búgin, 11:00

Uqsas jańalyqtar