Shoq qaıyńnyń qyltasynan tórt salt atty bir-birimen úzeńgi qaǵystyryp, shoqytyp shyǵa kelgende tún qarańǵysy jańa-jańa sógile bastaǵan edi. Tańǵy aýada shyńyltyr aıaz bar. Aq mamyq kórpege oranǵan saıyn dala erkin kósilip, únsiz múlgip tur. Kóz janary jetetin tóńirek typ-tynysh, typ-tymyq. Áldeqaıdan saýysqannyń óli tynyshtyqty buzyp, shyqylyqtaǵany estiledi. Iyqtaryna myltyq asynyp, qoldaryna qamshy ustap, toq jaraý at mingen ańshylar jyly kıinipti. Tańǵy tynyq aýany dar-dar aıyryp, áńgime aıtyp keledi.
Qarlykól aýylynyń turǵyny Aıbek Ysqaqtyń bul óńirde kezdese bermeıtin tegi asyl, tuqymy sırek tazysynyń keıpi sheber sýretshi salǵan kórkem týyndy tárizdi eken. Aq qardyń ústinde jarǵaq qulaqtary damylsyz deleńdegen degdar tazynyń júni suıyq, qap-qara monshaq tańbaly úshkil tanaýly, dóńes jondy. Kózderi aqyl men ójettilikke tunyp turǵandaı.
– Myna Imantaýǵa Qyrǵyzstannan kóship kelgen aǵaıyndarda tazynyń taıǵan degen túri bar eken. Jalpy nobaıy uqsas. Jalǵyz-aq ereksheligi quıryǵynda. Sosyn myna tazylar tárizdi jylanbas, túlki tumsyq, qasqyr sheke emes. Al quıryqtarynyń ushy súıeksiz, qamshyquıryq. Aǵaıyndardyń aıtýyna qaraǵanda, taýly jerde aldarynan ań qashyp qutylmaıtyn kórinedi, – deıdi seriktese shyqqan ańshy.
Tazy arqan boıy jerde iz kesip keledi. Keshe jaýǵan qar ústi josylyp jatyr. Áne bir jerde qoıan izi, shym-shytyryq árqıly qustardyń taban tańbasy. Myna tusta tyshqan jorǵalapty. Tekti tazy buta túbin shıyrlap, iz josyǵyn shyǵara almaı júr. Tańǵy taza aýadan áldebir ıis ańdaǵandaı orǵyp-orǵyp sekiredi. Úıine jańa tolǵan, alǵash ret qar basyp turǵan tazynyń dene bitimi somdanyp, qulaqtarynyń buıra shashaqtary tógilip, jumsaq túkteri qaqtaǵan aq kúmisteı jylt-jylt etedi. Maıysqaq quba tal tárizdi aıaqtarynyń bulshyq etteri taramdanyp, bolat serippedeı shıryǵyp tur.
– Dúbára tazylardyń kózi oınamaly, urlyqshy, aýzyna ne tússe sony jeı beretin suǵanaq bolady, – dedi jańaǵy ańshy, – al, tamaqty talǵap ishetin, minezi baısaldy, salmaqty tazylar tektiligin ańǵartyp turady ǵoı.
Ańshylar bulań quıryqpen Aqkóldiń qabaǵyna ilikkende kún arqan boıy kóterilgen. Kenet qamshylar jaq bettegi qaıyń shoqtyń baýyrynan áldeneniń jalqyn tústi sulbasy qylań ete qaldy.
– Túlki, – dep aıǵaılap jiberdi qaraqasqa atty ańshy, – túlki qashty.
Tuńǵysh ret qar basqan kúshik tazy áýeli qar ústinde janǵan ottaı jalt-jult etken beıtanys ańǵa tańyrqaı qaraǵan. Sálden soń josyltyp shaba jóneldi. Qutty adyrnadan ajal ańsap atylǵan sur jebedeı ekpindi.
Jetkenimen túlki aýyz saldyrmady. Uzyn, úlpildegen quıryǵyn kóldeneń tastap bulǵap qalǵanynda áli aýyzdanbaǵan jas tazy lyqsyǵan ekpinin basa almaı, ilgeri ozyp baryp, omaqasa qulaı jazdady. Qý túlkiniń aýyzdanbaǵan ıtti jer qaptyratyn ejelgi ádisi. Biraq saıyn dalada jelmen jarysqan júıriktik óz degenine jetkizbeı qoımaıdy eken. Sútpisirim ýaqyt áýrelenip, ábden áýre-sarsańǵa túsken kúshik tazy túlkiniń túbine jetti. Sol sát alpys eki tamyrdaǵy qan oınap, áldebir shattyq jaılaǵan.
It ustaýǵa qumar Aıbek Ysqaq tazyny kózin tyrnap ashqannan beri serik etip keledi. Bul óner ákeden juqqan, al ákesiniń aıtýyna qaraǵanda, burynǵy ótken atalarynyń bosaǵasynan degdar tazy ketpegen eken.
– Aǵam ekeýmiz bala kúnimizden ıtjandy bolyp óstik, – deıdi ıtbegi Aıbek Ysqaq, – tazy jaryqtyq dalanyń sáni ǵoı. Qazir barlyq qajetti qujattaryn túgendep, elimiz boıynsha ótetin dúrmekti jarystar men kórikti kórmelerge qatysyp júrmiz. Tuqymy tym azaıyp qalǵan taza qandy tóbet pen tazyny suryptap, qalǵyp ketken qasıetti dástúrdi qaıtadan jańǵyrtý bárimizge paryz. О́tken jyly karantınge baılanysty birneshe jarystar ótkizilmeı qaldy. Áıtse de onyń aldynda Qaraǵandy qalasynda ótken respýblıkalyq jarysqa qatysyp, júldeli oralǵanymyz bar.
Itbeginiń aıtýyna qaraǵanda, tazynyń alǵyr bolyp ósýi tárbıeleýden eken. Máselen, osy kúshik tazylardy ań qaǵyp júrgen, aýyzdanǵan ıtterge qosqan durys. Sonda ádis-tásildi meńgermek. Betin qaǵýǵa áste bolmaıdy. Olaı etseń, jasqanshaq, jaltaq bolyp qalýy múmkin. Eń bastysy, ıttiń minez-qulqyn tilsiz túısiný. Osylaı qalyptassa, ol da seniń ishki nıetińdi kózińnen ańdap, qabaǵyńnan tanıtyn bolady. Sál qysqartyp aıtqanda, ańshy men tazy tutas bir álem. Birin-biri emeýrininen tanysa ǵana aldyndaǵy ańdy qutqarmaıtyn bolyp qalyptasady. Al oǵan jetkenshe qanshama ýaqyt mashyq qalyptastyrý kerek.
Itbeginiń paıymdy pikirin aqyl tarazysyna salyp ekshegende ulttyq dástúrdiń ulaǵatyn uǵýdyń ózi zeıindilerdiń ǵana peshenesine jazylǵan dúnıe eken destik. Áıtpese jeńil-jelpi qaraǵan adam ıt tilin, onyń tilsiz aıtqan tilegin uǵa alar ma-aý.
Qanjyǵasy qamdanǵan ańshylar máz. Búgin tazylary aýyzdanyp, aıdy aspanǵa bir-aq shyǵardy. Jalpaq jonda ıt júgirtken adamǵa budan artyq ne kerek. Osy qas-qaǵym sát dala uldarynyń kókiregine qýanysh syılady. Bylaıǵy jurt túsinbeıtin kóńildiń bir sáti. Qyrmyzy qyzyl túlkini «úıirimen úsh toǵyz» dep aqsha qardyń ústinde bir soǵyp alyp, qanjyǵaǵa baılaǵan sát tilmen sıpattaýǵa kelmeıtin shattyqtyń shyrqaý bıigindeı. Jan jadyrap, kóńil qusy ushar basy kók tiregen Aqsorań taýdyń bıiginde qalqyp turǵandaı. Arydaǵy ańsaq atalar ótkenshi dúnıeniń qyzyǵyn bilgen-aý, sirá!..
