Qazaqstannyń Aýyl sharýashylyǵy mınıstri Belarýs Respýblıkasynyń Aýyl sharýashylyǵy jáne azyq-túlik mınıstri Ivan Krýpkomen kezdesti. Budan soń aýyl sharýashylyǵy salasyndaǵy ekijaqty yntymaqtastyqtyń perspektıvalyq baǵyttaryn ázirleý jónindegi Qazaqstan-Belarýs jumys tobynyń ekinshi otyrysyna qatysty.
Sondaı-aq, mınıstr №1 Mınsk sút zaýytyna, taýarly-sút fermasyna jáne «Dzerjınskıı» agrokombınatynyń qus fabrıkasyna bardy.
Búgin Saparhan Omarov «Belgospısheprom» konserninde kelissózder júrgizbek. Odan keıin «Mınsk» traktor zaýytyna, Belarýs Memlekettik agrarlyq tehnıkalyq ýnıversıteti janyndaǵy AО́K kadrlarynyń biliktiligin arttyrý jáne qaıta daıarlaý ınstıtýtyna, «Belarýs UǴA Aýyl sharýashylyǵyn mehanıkalandyrý jónindegi ǵylymı-praktıkalyq ortalyǵy» respýblıkalyq birtutas kásipornyna barady.
Belarýs Respýblıkasynyń Aýyl sharýashylyǵy jáne azyq-túlik mınıstrliginde ótken kezdesýde Qazaqstan men Belarýs Premer-Mınıstrleriniń eki eldiń AО́K salasyndaǵy yntymaqtastyǵyn tereńdetý jónindegi kelisimderin damytý úshin Saparhan Omarov pen Ivan Krýpko aýyl sharýashylyǵy ónimderiniń ózara saýda kólemin ulǵaıtý, agrarlyq ǵylymǵa, sútti mal sharýashylyǵy men ósimdik sharýashylyǵyna qatysty ózara is-qımyldy arttyrý máselelerin talqylady.
Mınıstr Saparhan Omarov dostyq qarym-qatynastaǵy bul eldiń aýyl sharýashylyǵy shıkizatyn óńdeý, sapaly ári qoljetimdi jáne básekege qabiletti azyq-túlik ónimderin óndirýdegi tájirıbesi nazar aýdartatynyn atap ótti.
Sonymen qatar, mınıstrler eki el prezıdentteriniń QHR naryǵyna shyǵý úshin Qazaqstanda birlesken sút óndirisin qurý týraly tapsyrmalaryn iske asyrýdy talqylady.
Osydan keıin Saparhan Omarov azyq-túlik qaýipsizdigi jáne ımportty almastyrý taqyryby aıasynda baý-baqsha sharýashylyǵy jónindegi yntymaqtastyq máselesin qozǵady. Ol Qazaqstan qarqyndy baqqa kóshetinin, kúnbaǵys pen súıekti jemis daqyldarynyń kóshetterin óndiretin iri In-vitro zerthanasyn salý josparlanǵanyn habarlady. Osyǵan baılanysty QR Aýyl sharýashylyǵy mınıstrligi Belarýs kompanııalaryn jobanyń birlesken ınvestory bolýǵa shaqyrdy.
Keńeıtilgen quramda kóterilgen máselelerdi talqylaý aýyl sharýashylyǵy salasyndaǵy ekijaqty yntymaqtastyqtyń perspektıvalyq baǵyttaryn ázirleý jónindegi Qazaqstan-Belarýs jumys tobynyń alańynda jalǵasty.
Otyrys ózara túsinistik jáne iskerlik áriptestik deńgeıinde ótti. Taraptar agroónerkásip kesheni salasyndaǵy ózara is-qımyldy damytýǵa nıet bildirdi.
