Zaýrbek Iаndıev árqıly ydystar men jeıdelerdiń syrtyn kóztartarlyq etip bezendiredi eken. Kórkem sýretteı qulpyrǵan buıymdar syrtqy pishinimen-aq tutynýshylardyń nazaryn ózine aýdarady. Sondyqtan da ótimdi. Al alýan mazmundaǵy dızaındy áleýmettik jeliden izdep tabady. О́ziniń balǵyn qııalynan týyndaıtyn keskindemeler de bar. Taýary ótip turǵan soń táp-táýir tabys ta oralýda. О́z basyna bir tıynyn da jumsamaı, barlyǵyn tolaıym dertke shaldyqqan balalarǵa baǵyttaıdy. Olar qýansa, názik jany masaırap, tóbesi kókke bir-aq eli jetpeı qalǵandaı sezinedi. О́zgeni qýantýdyń, janynda júrgen, qamqorlyqqa muqtaj adamnyń shattanǵanyn kórýdiń ózi estigen jannyń jan dúnıesin ýyljytyp jiberetin bir ádemi sezim. Jas kásipker osylaısha túısinedi. Qurbylarynyń boıyndaǵy qasirettiń salmaǵyn qapysyz uǵady. О́ıtkeni bir kezde ózi de dál osyndaı dertke dýshar bolǵan. Biraq qaısar minezdi bala esh moıymaı kúresse kerek. Jas qaıyńdaı solqyldaǵan qurysh dene men qaıtpas qaısar minezi túptiń túbinde dertti jeńip shyǵypty. Endi ózgelerge dem bermek, qoltyǵynan dememek. О́mirge degen súıispenshiligin arttyryp, jabysqan dertti jaǵasynan alyp laqtyryp jiberýge bolatynyn sanalaryna jetkize otyryp uǵyndyrmaq.
Shyntýaıtynda jas kásipker uzaq jyl boıy aýrýhana tósegine tańylyp jatypty. Áldeneshe ret ota jasatqan. Alǵashqylary sátsiz aıaqtalypty. Sonda da úmitin úzbegen. Keıingisi Qostanaı qalasynda jasalǵan sońǵy otasy sátimen sabaqtalyp, aıaǵyn qaz basyp ketken. Biraq, sol bir qasiret qabyrǵasyn qaıystyrǵan, denesin dert meńdegen shaq esinen bir sát ketken emes. Netken surapyl sumdyq deseńizshi?! Tósekke tańylyp qalamyn ba dep qoryqqan. Máńgilik múgedek bolý kimge ońaı deısiń. О́zi de ılana almaı tursa da, túptiń túbinde jeńip shyǵatynyna kámil sengen. Basyna tóngen qaıǵynyń qara bultyn názik qoldarymen serpip tastaýǵa talaı umtylǵan. Aqyry tilegi qabyl boldy. Endigi tilegi ózi tárizdi muńaıǵan, ómirden baz keshe jazdap júrgen balǵyndarǵa kómektesý. Olardyń jaıyn ózindeı kim uqsyn? Al mundaı balalar az emes. Oblys boıynsha 900-ge jýyq. Solardyń biri – Býrabaı aýdanyndaǵy Kenesary aýylynyń turǵyny Bahtııar Bespaev nebári 11 jasta. Bahtııardan bul derttiń belgileri ómirge kelgen kezden biline bastaǵan. Sodan beri janyn jegen dertpen arpalysyp keledi. Balǵyn kásipker Zaýrbek Iаndıev eń alǵashqy syılyǵyn osy Bahtııarǵa jasady. Úmit otyn tutatý úshin óziniń basynan keshken oqıǵasyn da aıtyp berdi. Rýhanı aǵasynyń jan syryn estigen Bahtııardyń da janary jaınap ketti. Endi úzilgen úmit jalǵanǵandaı, kókirektegi sónip bara jatqan oty qaıta laýlap janǵandaı.
– Meniń balama osy kezge deıin úsh márte ota jasaldy, – deıdi anasy Rahıma Ábdiǵaparova, – shynyn aıtqanda, qajetti ortopedııalyq aıaq kıimderdiń quny óte qymbat. Sońǵy bireýin Reseıden 90 myń teńgege aldyrttym. Endi mine, Zaýrbek qulynym tegin syılap otyr. Bahtııarǵa aıtqan óziniń ómir tájirıbesi aıaq kıimnen de qymbat. Kúnderdiń bir kúninde meniń balam da Zaýrbek sııaqty qatarǵa ilinip kete me dep úmittenemin.
Bar bolashaǵy alda Bahtııar otbasyndaǵy tórt perzenttiń kenjesi eken. Kenje bala kúni erteń Zaýrbek tárizdi qaz basyp keterine senimdi. Qarapaıym aıaq kıimder aıaǵyn qajap júr edi, myna syılyq kóńilden shyǵyp-aq tur. Balǵyn kásipkerdiń bastamasyn aqyl tarazysyna salyp otyryp, el ishindegi muqtaj jandardyń esh ýaqytta qamqorlyqsyz qalmaıtynyna kámil sendik. Nebári on ekige jańa tolǵan órimdeı jas eliniń eldigin, balalardyń baqytty bolashaǵyn oılap júrse, bizdiń el kimnen kem bolmaq?! Alǵa qoıǵan bar maqsat-murat ta, jan jadyratar jaqsylyq ta osy emes pe?!
KО́KShETAÝ
