Is-sharaǵa QR Premer-Mınıstriniń orynbasary Eraly Toǵjanov, Eńbek jáne halyqty áleýmettik qorǵaý mınıstrliginiń ortalyq apparaty men qurylymdyq bólimsheleriniń basshylary, QR Parlamentiniń depýtattary, QR Prezıdenti Ákimshiliginiń, QR Premer-Mınıstri Keńsesiniń jáne ortalyq memlekettik organdardyń ókilderi, oblystar men Nur-Sultan, Almaty, Shymkent qalalary ákimderiniń orynbasarlary, halyqaralyq uıymdardyń, kásipodaqtardyń ókilderi jáne taǵy basqa taraptar qatysty.
Serik Shápkenov óz sózinde 2020 jyldyń sońyna qaraı Eńbekmıni áleýmettik-eńbek salasyn sıfrlandyrý boıynsha eleýli nátıjege qol jetkizgenin atap ótti.
«Biz qyzmetterdi 91%-ǵa sıfrlandyrdyq, 44 qyzmettiń 40-y elektrondyq, onyń 18-i proaktıvti túrde usynylady. 2020 jyldyń qorytyndysy boıynsha 12,4 mln. qyzmet kórsetildi, onyń 7,8 mıllıony elektrondyq qyzmetke jatady. Memleket basshysynyń tapsyrmasyna sáıkes 2021 jyly zeınetaqy men járdemaqy taǵaıyndaý prosesteri sıfrlandyrylatyn bolady», – dedi mınıstr.
Sonymen qatar, ol Eńbekmıni Áleýmettik qyzmetter portalyn damytýdy jalǵastyratynyn atap ótti. Osylaısha kórsetiletin qyzmetterdiń sapasyn arttyrýǵa jáne sybaılas jemqorlyq táýekelderin azaıtýǵa múmkindik týady. Portalda tehnıkalyq quraldar men ońaltý qyzmetteriniń tizimi birtindep keńeıip keledi, taýarlar men arnaıy áleýmettik qyzmetterdi jetkizýshiler sany ósýde, 2023 jyldan bastap ınvataksı qyzmeti resýrsqa kóshedi.
«Sonymen qatar, biz Sıfrlyq otbasy kartasyn qurýmen aınalysýdamyz. Joba ómirlik qıyn jaǵdaıdaǵy otbasylardy avtomatty túrde anyqtaýǵa baǵyttalǵan jáne bul azamattarǵa ártúrli memlekettik organdardyń quzyretine kiretin áleýmettik qoldaýdyń belsendi keshendi sharalaryn usynýǵa múmkindik beredi. Sıfrlyq áleýmettik karta otbasynyń ál-aýqatynyń deńgeıin boljaýǵa qabiletti. Osylaısha, júıe oǵan engizilgen algorıtmniń arqasynda azamattardyń kómekke júginýin kútpesten ómir súrý sapasyn jaqsartýǵa jáne azamattardyń áleýmettik osal sanattaryna qatysty alalaýdy boldyrmaýǵa kómektesedi», – dep naqtylady Serik Shápkenov.
Budan basqa, Eńbekmıni Elektrondyq eńbek bırjasy portalyn jetildirý boıynsha júıeli jumys júrgizýde. Resýrsta jumyspen qamtý ortalyqtarynyń qyzmetterin kórsetetin jańa servıster iske qosyldy. Oblys ortalyqtarynyń, oblystyq, respýblıkalyq mańyzy bar qalalardyń jáne elordanyń turǵyndary úshin jumys izdeýshilerdi jáne jumyssyzdardy tirkeý, memleket sýbsıdııalaıtyn jumys oryndaryna jiberý (áleýmettik jumys oryndary, qoǵamdyq jumystar, jastar praktıkasy), erikti qonys aýdarýǵa kómektesý sııaqty qyzmetterdi qashyqtyqtan usynýǵa jaǵdaı jasalady.
2020 jyldyń qarashasynan bastap, 14,5 myńnan astam adam qashyqtyqtan qyzmet alý múmkindigin paıdalandy. 11,7 myń azamat jumyssyz mártebesin alyp, 3,4 myń adam memleket sýbsıdııalaıtyn jumys oryndaryna jiberildi. 1,6 myńnan astam jumyssyz adam jumysynan aıyrylýy boıynsha áleýmettik tólemder alýǵa ótinish jiberdi, olardyń 80%-yn Memlekettik áleýmettik saqtandyrý qory maquldady.
2020 jyly portal arqyly 629 myńnan astam adam jumyspen qamtyldy, onyń 66% -y turaqty jumysqa ornalastyryldy.
