Ekonomıka • 27 Aqpan, 2021

Qaı salada jalaqy ósti?

44 ret kórsetildi

2020 jyldyń tórtinshi toqsanynda densaýlyq saqtaý jáne áleýmettik qyzmetter salasynda jalaqy aıtarlyqtaı ósim kórsetken. Naqtyraq aıtqanda, bir jylda 32 paıyzǵa artqan.

Atalǵan salalarda jyldyń sońǵy toqsanyndaǵy ortasha jalaqy 197,4 myń teńge, aldyńǵy jylmen salystyrǵanda 32,1 paıyzǵa joǵary bolǵan. Bul 2015 jyldan beri tirkelgen eń joǵarǵy jyldyq ósim. Inflıasııany eseptegende tólem qabiletiniń shynaıy ósimi 23,1 paıyzdy quraǵan.

Ranking.kz agenttigi elimizde ortasha aılyq jalaqynyń 14,3 paıyz nemese 233,1 myń teńgege óskenin habarlaıdy. Densaýlyq saqtaý jáne áleýmettik qyzmetter salasyndaǵy aılyq jalaqy eldegi ortasha jalaqydan 15 paıyzǵa az.

Densaýlyq saqtaý mınıstrligi men Qazaqstan salalyq kásipodaq uıymy arasynda qol qoıylǵan kelisimge sáıkes 2020 jyldyń 1 qańtarynan bastap dárigerlerdiń ortasha aılyq jalaqysy 30, medısınalyq qyzmetkerler jalaqysy 20 paıyzǵa kóbeıýi tıis bolǵan. 2021-2023 jyldary áleýmettik sala jumysshylarynyń jalaqysy eki ese kóbeımek: 2021 jyldyń 1 qańtarynan bastap – 50, 2022 jyldan bastap – 25, 2023 jyldan bastap taǵy 25 paıyzǵa. Mınıstr Alekseı Soıdyń aıtýynsha, 2023 jyly dárigerlerdiń ortasha jalaqysy eldegi ortasha jalaqydan 2 ese joǵary bolady.

О́ńirler bólinisi boıynsha, eń kóp jalaqyny Mańǵystaý oblysy (207,2 myń teńge), Almaty qalasy (209,9 myń teńge), Jambyl oblysy (156,2 myń teńge) jáne Nur-Sultan qalasynyń (281,7 myń teńge) dárigerleri alady. 2021 jyldyń qańtar aıyndaǵy jaǵdaı boıynsha, Qazaqstanda densaýlyq saqtaý jáne áleýmettik qyzmet salasynda 8,2 myń kompanııa tirkelgen. Onyń 6,8 myńy shyn máninde jumys istep turǵan mekemeler. Olardyń 6 myńǵa jýyǵy shaǵyn kompanııalar, iri kásiporyndar sany 549 bolsa, orta deńgeıdegi kásiporyndar sany – 395.

Osy eki salada eńbek etetin jumysshylar sany shamamen 426,4 myń adam. Olar eldegi barlyq jumysshylardyń 12,1 paıyzyn quraıdy.

 

 

 

  

 

Sońǵy jańalyqtar

Uqsas jańalyqtar