Táýelsizdiktiń 30 jyldyǵyna arnalǵan is-sharaǵa elimizdiń barlyq óńirlerinen 180 sportshy qatysty.
Jarys «Qazaq kuresi» qaýymdastyǵy bekitken «qazaq kúresi» erejeleri boıynsha ótýde. 26-sy kúni jalaýyn kótergen úsh kúndik boz kilemdegi básekede elimizdiń 17 quramasynyń balýandary -38, -42, -46, -50, -55, -60, -65, 70, -75, +75 kg salmaq dárejesinde synǵa túsip jatyr.
Jarystyń saltanatty ashylý rásimine QR Sport jáne Dene shynyqtyrý isteri komıtetiniń tóraǵasy Serik Sápıv, Nur-Sultan qalasy ákiminiń orynbasary Baqtııar Maken jáne «Qurmet» ordeniniń ıegeri,
QR Eńbek sińirgen sport sheberi, qazaq kúresinen halyqaralyq dárejedegi sport sheberi Aıbek Nuǵymarov qatysty.
Baqtııar Makenuly jarys qatysýshylaryna sáttilik tilep, -50,-55,-60,-65 kelide jeńiske jetken jarys jeńimpazdary men júldegerlerin arnaıy marapattady.
«Táýelsizdigimizdiń 30 jyldyǵyna arnalǵan qazaqsha kúres saıysyna qosh keldińizder. Ata babamyzdan kele jatqan dástúrli túrde ótetin qazaqsha kúres óziniń deńgeıinde ótýde. Elbasymyz, Tuńǵysh Prezıdent Nursultan Ábishuly Nazarbaev «Ulttyq sport túrlerin sonyń ishinde, qazaq kúresin olımpııalyq oıyndar deńgeıine deıin kóterýge kúsh salýymyz kerek. Qazaq sportyn damytýǵa barshamyz úles qosýymyz qajet» dep aıtqan bolatyn.
Prezıdentimiz Qasym-Jomart Kemeluly Toqaev «Qazaqtyń ulttyq sport túrlerin laıyqty joǵary deńgeıde kórsetý kerek»,- dep úlken maqsat qoıdy. Sondyqtan bizdiń árqaısymyzdyń mindetimiz – qazaq sportynyń damýyna óz úlesimizdi qosý. Sondyqtan da búgingi jarysta myna jas sportshylarǵa úlgi bolyp júrgen barsha azamattarǵa sáttilik tileımin», - dedi B.Maken óz sózinde.
Jarystyń bas tóreshisi Bolat Aqjigitov karantınge baılanysty ár óńirden óz salmaqtary boıynsha bir-bir sportshy iriktelip alynǵanyn aıtty.
«Chempıonatqa ár oblystan bir bir sportshy ǵana joldama aldy. Jarys barlyq sanıtarlyq normalar men qaýipsizdik erejesin saqtaı otyryp ótkizilýde. Jarysqa reıtıngten ótken, arnaıy shaqyrylǵan úzdik 20 tóreshi tórelik etti. Barlyq balýandardyń daıyndyq deńgeıi jaqsy, bári bir deńgeıde, sebebi bir jyldan keıingi birinshi jarysymyz bolǵandyqtan biraz sportshylarymyzdyń salmaqtary ósti. Barlyǵy joǵary deńgeıde ótýde», - dedi Bolat Aqjigitov.
«Qyzylorda oblysy Qyzylorda qalasynan osy jarysqa, ıaǵnı QR Chempıonatyna keldim. Esimim Baýyrjanuly Sheıhrahman. Jarysqa karantın rejıminde daıyndaldyq. Sol jaǵynan qıyndyqtar boldy. Búgin jarysqa kelgen sportshylardyń barlyǵy myqty, osaly joq. Beldesýde meniń qarsylastarym myqty boldy. Búgin meniń baǵym men babym shaýyp osy jarysta jeńimpaz atanyp, 1-oryndy ıelendim. Aqtyq synda men Jambyl oblysynyń balýanymen beldestim jáne ony aıqyn basymdyqpen jeńdim»,- dedi Qyzylorda oblysynyń balýany Sheıhrahman Baýyrjanuly.
El chempıonatynyń uıymdastyrýshylary - Nur-Sultan qalasynyń Dene shynyqtyrý jáne sport basqarmasy jáne «Qazaq kuresi» qaýymdastyǵy.
