6 naýryzda alǵashqy 13 er-azamat konstıtýsııalyq mindetin oryndaý úshin attanady. Qazir olar shaqyrý komıssııasynyń otyrysynan ótýde. Onda shaqyrý komıssııasynyń tóraǵasy men medısınalyq komıssııa tóraǵasynyń qatysýymen kandıdatty qaıta tekserý júrgiziledi. Onyń qyzmetiniń motıvi men psıhologııalyq kózqarasy tekseriledi.
Shymkenttiń jergilikti áskerı basqarý organdarynda atap ótkendeı, elimizdiń úshinshi megapolısiniń jastary áskerı qyzmetke belsendi qyzyǵýshylyq tanytýda, sonyń esebinen básekelestik týyndaıdy jáne tek úzdikter ǵana áskerge attana alady.
Áskerge shaqyrylýshylar men laýazymdy tulǵalar arasynda koronavırýstyq ınfeksııanyń taralmaýy úshin jınaq pýnktterde medısınalyq beketter ornalastyryldy. Oblystyq medısınalyq komıssııalardyń quramyna ınfeksıonıst dárigerler engizildi.
Jas býyn áskerı bólimderge keter aldynda mindetti túrde PTR-zertteý ádisimen COVID-19-ǵa zerthanalyq zertteý júrgiziledi. Al bólimge kelgennen keıin jastar eki aptalyq karantınge oqshaýlanady. Karantın kezinde medısınalyq tekserý jáne áleýmettik-psıhologııalyq zertteý júrgiziledi.
Keıinge qaldyrýǵa quqyǵy bar áskerge shaqyrylýshylar sanatyn keńeıtý de mańyzdy jańalyq bolyp tabylady. Endi keıinge qaldyrý qosymsha: pedagogterge, olardyń búkil jumys kezeńine, sondaı-aq quqyq qorǵaý organdarynyń bilim berý mekemelerinde oqýdan ótip jatqan adamdarǵa beriletin bolady.
