Túrkistan qalasynda tazalyq naýqany júrip jatyr. Ár senbi kúni qala aýmaǵynda jalpyhalyqtyq senbilik uıymdastyrylýda. Sharaǵa atsalysqan azamattar alǵys hatpen marapattalady. Qalany qoqystan tazartyp, tazalyqty saqtaýǵa járdem berip, janashyrlyq tanytqan jandar tal egý jumystaryna da belsendi qatysýda. Qala turǵyndary óz aýlalary men kóshe aýmaqtaryndaǵy qoqystar, aryqsha ishterin tazalasa, qyzmetkerler mekeme mańdaryna tazalyq jumystaryn júrgizýde.
Qaladaǵy qurylys nysandarynda júrgizilip jatqan jumystardyń barysymen tanysqan oblys basshysy shahardy jaryqtandyrýda qolǵa alynǵan jańa jobalarmen tanysty. Túrkistandaǵy barlyq iri ǵımarattar, saıabaqtar, kópirler men demalys oryndary bir úlgide jaryqtandyrylyp, qalaǵa qaıtalanbaı reńk berdi. Kóne shahar birneshe baǵytta kórkeıip, zamanaýı tehnologııalardyń kómegimen «aqyldy qalaǵa» aınalýda.
