Qazaqstannyń atynan 5 sportshy qatysty – Meıirjan Adııarov, Dıas Qadyr, Ilııas Jaqsybek, Aıbek Tursynaqyn jáne Sultan Saǵatbek. Balalarda tirek-qımyl apparaty buzylǵan. Olardyń barlyǵy «Samruk-Kazyna Trust» Áleýmettik jobalardy damytý qorynyń qoldaýymen «Teń múmkindikter álemi» QQ iske asyryp jatqan «Salamatty bolashaq» jobasy aıasynda beıimdelgen sport seksııalaryna barady.
Meıirjan men Dıas komandaǵa eki «altyn», Sultan men Ilııas qola medalǵa ıe boldy. Aıbek Tursynaqyn TQAZ (tirek-qımyl apparaty zaqymdanǵan) Sporttyq jekpe-jek federasııasynyń prezıdenti Sergeı Semaıkınnen jeke medal aldy.
Bul uldardyń ózge elge baryp qatysqan alǵashqy jarystary, olar óte muqııat daıyndaldy, jattyǵýǵa kóp saǵat jumsady, kún tártibin kúsheıtti.
«Men jarystarǵa dostarymmen jáne senseımen bardym. Karatemen 4 jyldan beri aınalysyp kelemin. Buryn men jarystarǵa qatystym, biraq tek Qazaqstanda, sondyqtan osy joly qatty ýaıymdadym. Jarys aldynda biz kún saıyn jattyǵyp júrdik, meniń barlyq dostarym júldeli oryndarǵa ıe bolǵysy keldi. Meıirjan ekeýmiz «altyn» jeńip alǵanymyzǵa óte qýanyshtymyn. Basqa dostarym úshin de óte qýanyshtymyn – olar qola medal aldy», deıdi Dıas Qadyr.
Balalardy jarystarǵa senseı, súıikti jattyqtyrýshy, kóp jyldan beri «erekshe» balalarmen jumys istep kele jatqan Jáńgir Jumabekov daıyndady. Parakaratıster komandasynyń jarysqa qatysýy «Samruk-Kazyna Trust» qorynyń «Jas daryndar» jol júrý granttaryn usyný jobasynyń arqasynda múmkin boldy.
«Birneshe jyl buryn bizdiń elimizde beıimdelgen dene shynyqtyrý degenniń ne ekenin eshkim bilmedi. Al búginde bizdiń sportshylar halyqaralyq jarystarda óner kórsetip, birinshi oryndarǵa ıe bolýda. Bizdiń qoldaýymyzdyń arqasynda BDT ádistemelik quraldary ázirlenip, bilim berý júıesine engizildi, beıimdeý seksııalary búkil Qazaqstan boıynsha ashylýda. Bul iri júıeli áleýmettik ózgeristerdiń shaǵyn bastamasy ǵana», deıdi «Samruk-Kazyna Trust» qorynyń resmı ókili Mıras Irgebaev.
«Teń múmkindikter álemi» QQ basshysy Nurgúl Úljekovanyń aıtýynsha, jarysqa qatysý balalardyń sporttyq kókjıegin keńeıtip, baǵa jetpes tájirıbe alýǵa múmkindik berdi.
«Olar úshin árbir jarys – bul óz-ózin jeńý, sheksiz múmkindikterin kórsetý múmkindigi jáne óziniń sporttyq sheberlikke degen umtylysynda deni saý qurdastarynan qalmaý. Múgedek balalardyń sporttaǵy mundaı jetistikteri basqa balalar úshin jaqsy úlgi bolady dep senemin. О́ıtkeni, sport adam ómiriniń barlyq salasyn qamtıtyn úzdiksiz ońaltýdyń eń tıimdi quraly bola alady», dep atap ótti Nurgúl Ýljekova.
Aıta keteıik, «Jas daryndar» jobasy daryndy balalarǵa respýblıkalyq jáne halyqaralyq jarystarǵa, baıqaýlarǵa, olımpıadalarǵa qatysý úshin jol júrý granttaryn usynady. Jol júrý grantyn alýǵa ótinimdi 18 jasqa deıingi balalardyń ata-analary nemese qamqorshylary, balalar ujymdarynyń, áleýmettik mekemelerdiń basshylary bere alady.
