Dastan 1985 jyly Almaty oblysynyń Kerbulaq aýdanyndaǵy Qoǵaly aýylynda dúnıege keldi. Uzaq jyldar boıy ákesi Tileýbaı avtobazada bas mehanık, al anasy Nesiphan jınaq bankinde býhgalter jáne esepshi bolyp eńbek etti. Olar úsh perzent tárbıelep ósirdi. Úıdiń tuńǵyshy – Darhan, ortanshysy – Dáýren jáne kishisi – Dastan. Sádýaqasovtar shańyraǵyndaǵy barlyq ul sportqa etene jaqyn bolǵanymen, solardyń arasynan sút kenjeleri sýyrylyp shyqty.
– 1998 jyly «Habar» arnasynan Qazaqstan men Kýba boksshylary arasyndaǵy kezdesýdi kórsetti, – dep bastady óz áńgimesin Dastan. – Jýan judyryqty jigitterdiń «jan alysyp, jan berisken» jekpe-jekterin basynan aıaǵyna deıin tapjylmaı tamashaladym. Sol sátten bastap osy sport túrine ańsarym aýdy. Sodan keıin sport taqyrybyna jazylǵan kitaptar men maqalalardy izdep júrip oqýdy ádetke aınaldyrdym. «Egemen Qazaqstan», «Jas Alash», «Sport», «Prosport» jáne taǵy basqa basylymdarda jaryq kórgen dúnıelerdi qalt jibermeýge tyrystym. Seıdahmet Berdiqulov, Nesip Júnisbaev, Qydyrbek Rysbekuly, Baqtııar Taıjan, Eseı Jeńisuly jáne siz jazǵan kitaptar men maqalalardy bas almaı oqydym. Ásirese, boksshylardyń júrip-ótken joly, qol jetkizgen tabystary, olardyń taǵdyry meni qatty qyzyqtyratyn. Sol shyǵarmalardy jaı oqı otyryp, eseıe kele sondaǵy keıipkerlerdeı bolsam ǵoı dep qııaldaıtynmyn. Mine, sporttyń sıqyryna men osylaı arbaldym. Biraq Qoǵalyda boks úıirmesi bolmaǵandyqtan, basqa sport túrlerimen shuǵyldanýyma týra keldi.
1999 jyly Sádýaqasovtar otbasy sol óńirdegi Eskeldi aýdanynyń Qarabulaq aýylyna kóship bardy. Ata-analary basqa jaqqa qonys aýdarý jóninde sheshim qabyldaǵanda, Darhan men Dáýren qandaı kúıde bolǵany bizge beımálim, al Dastannyń qýanǵany anyq. Jatsa da, tursa da boksshy bolsam dep qııaldap júrgen oıyn balasynyń asqaq armany endi oryndalýy múmkin. О́ıtkeni Qarabulaq Taldyqorǵan qalasynyń irgesinde ornalasqan. Jáne de onyń
aýdan ortalyǵy degen mártebesi bar. Al 15 myńnan asa turǵyny bar osyndaı iri eldi mekende boks úıirmesiniń bolmaýy múmkin emes qoı. Dál osyndaı oımen qarýlanǵan Dastan Qarabulaqqa jetkenshe asyqty.
Aýdan ortalyǵyna qonystanyp, Shoqan Ýálıhanov atyndaǵy orta mekteptiń tabaldyryǵynan attap, jańa ortaǵa beıimdelgennen keıin Dastan óziniń synyptastary men jora-joldastarynan qaı jerde bokspen aınalysýǵa bolatyny jaıynda surastyrdy. Biraq úıi men mekteptiń mańy turmaq, búkil Qarabulaqta ondaı úıirme joq eken. Bala kóńili sý sepkendeı basyldy. Sodan ol úıine kelgen soń óz betinshe jattyǵýdy jón kórdi. Ishi qumǵa tolǵan qapty qoraǵa ilip, sony aıyzy qanǵansha soqqylaıtyn. Odan qalsa, temir-tersek kóterdi. Bokstan biraz habary bar aǵasy Darhan da inisine biraz nárse úıretti.
– Birde Qýanysh esimdi jattyqtyrýshy bizdiń mektepke bas suqty. Biraz jyl bokspen shuǵyldanǵan eken. Qaraǵandydaǵy Álııa Moldaǵulova atyndaǵy sport-ınternattyń túlegi kórinedi. Ol sóz arasynda aýdan ortalyǵynda boks zalyn ashsam degen nıeti bar ekenin aıtyp qaldy. Bul áńgimeni estigen men aǵanyń qyr-sońynan qalmadym. Tań ata, tús qaıta, keshkisin sol kisini ańdýmen boldym. Sondaı qarbalas kúnderdiń birinde ol kisi aýdan basshylyǵy tarapynan qańyrap bos jatqan bir ǵımarattyń bizge berilgenin aıtty. Biraq onyń ishin tazalap, jóndeý jumystaryn júrgizip, qajetti quraldarmen jabdyqtaý qajet. Ol jaǵyna bıýdjetten aqsha qarastyrylmaǵan. Amal joq, qara jumystyń bárin moınyma alýyma týra keldi. Alǵashynda ózim quryptas balalardyń birazyn úgittep, sol jaqqa ózimmen birge aparǵan edim. Alaıda jumystyń óte aýyr ekenine kóz jetkizgen soń olar at-tondaryn ala qashty. Kelesi kúni eshkim kelmedi. Sodan jalǵyz ózim aq ter, kók ter bolyp, birer kún ǵımarattyń ishin tazaladym. Ol jerden bir «KamAZ» koqys shyǵardym. Odan keıin qajetti qural-jabdyqtardy bapkerimiz ekeýmiz qoldan jasadyq. Sóıtip, Qýanysh aǵanyń qol astynda jattyǵyp, aýdan jáne oblys kólemindegi jarystarǵa qatysa bastadym, – dep Dastan ótken kúnderdi eske aldy.
2002 jyly orta mektepti aıaqtaǵan soń Dastan Sádýaqasov Almatyǵa kelip, respýblıkalyq sport kolledjine oqýǵa túsýge bekindi. Qazaq sportynyń qara-shańyraǵyna ekiniń birin qabyldaı bermeıtini belgili. Ol jerde Qazaqstannyń ár aımaǵynan kelgen asa daryndy balalar ǵana bilim alyp, sportpen shuǵyldaný múmkindigine ıe bolady. Keminde halyqaralyq týrnırde nemese el birinshiliginde atoı salýǵa tıissiń. Al Dastanda ondaı ataqtyń biri de joq. Onyń qolynda tek Almaty oblysy birinshiliginiń qola júldegeri jáne respýblıkalyq týrnırdiń fınalısi degen marapat qaǵazy ǵana bar.
Jas jigittiń rıngke shyǵýǵa asyǵyp, julqynyp turǵanyn baıqaǵan aǵaly-inili Asqarbek pen Dýlat Ǵazızovter syndy qyraǵy bapkerler Dastannyń áleýetin baıqaýǵa bekindi. Jetisýlyq órendi olar odan áldeqaıda tájirıbeli boksshylarmen jekpe-jekke shyǵardy. Bul synaqtan Sádýaqasov múdirmeı ótti. Alǵashqy qarsylasynyń murnyn syndyryp, ekinshisiń qabaǵyn jaryp, ekeýin de qan-josa qyldy. Bapkerler biraz keńese kele, namysqoı jigitti kolledjge qabyldady.
Kóptegen sport juldyzdaryna úlken arenaǵa dańǵyl jol ashqan qara- shańyraqta úsh jyl tálim-tárbıe alǵan Dastan ony aıaqtaǵannan keıin Qazaq sport jáne týrızm akademııasyna oqýǵa tústi. Sol kezderi jastar arasynda Almaty qalasy birinshiliginde eki ret kúmis medaldy ıelendi. Halyq Qaharmany Qaırat Rysqulbekov pen ataqty bapker Gennadıı Rojkovty eske túsirýge arnalǵan respýblıkalyq týrnırlerde júldegerler sanatynan kórindi. Basqa da jarystarda olja saldy. Sondaı týrnırlerdiń birinde sol kezdegi Azııa chempıony, bolashaq Olımpııa oıyndarynyń jeńimpazy Baqyt Sársekbaevpen de judyryqtasqany bar.
Shyny kerek, boksqa kesheýildep kelgen jigittiń odan da bıik belesterdi baǵyndyrýǵa múmkindigi bolmady. Úılendi, náresteli boldy, jan baǵý kerek degendeı... 2007 jyly Qazaq sport jáne týrızm akademııasyn támamdaǵan soń Dastan sol bilim oshaǵynda oqytýshy bolyp qyzmette qaldy. Sonymen qatar bapkerlikti de qatar alyp júrdi. Al bul kásipte keıipkerimizdiń baǵy jandy dep aıtýǵa tolyq negiz bar. Dastan Tileýbaıulynan tálim-tárbıe alǵan Samat Úısinbaev pen Álisher Súleımenov sport sheberi normatıvin oryndady. Bekbolat Quramysov stýdentter arasyndaǵy álem chempıonatynda eki ret kúmis medaldy ıelenip, Azııa birinshiliginde qola júldeni enshiledi. Eresekterdiń el chempıonatynda úshinshi orynǵa taban tirep, birer jyl Dúnıejúzilik boks serııasy (WSB) dodasynda «Astana arlandary» klýby sapynda óner kórsetti. О́ziniń osyndaı eleýli tabystarynyń arqasynda B.Quramysov halyqaralyq dárejedegi sport sheberi ataǵyn aldy. Bul kúnderi Bekbolat kásipqoı rıngte kúsh synasyp júr.
Sádýaqasov óziniń tól shákirtterimen qatar, Jánibek Álimhanulyn da jattyqtyrdy. Jalpy, álem jáne qurlyq chempıony, Azııa oıyndarynyń jeńimpazy degen dardaı ataǵy bar áıgili bylǵary qolǵap sheberiniń jeke bapkeri Murat Sıqymbaev ekenin jurt jaqsy biledi. Desek te Akademııa qabyrǵasynda júrgende Jánibektiń sheberliginiń shyńdalýyna bizdiń búgingi keıipkerimizdiń de qosqan ózindik úlesi bar.
2016 jyly Dastan Sádýaqasov Qazaqstannyń stýdentter qurama komandasynyń aǵa jattyqtyrýshysy bolyp taǵaıyndaldy. Mine, dál sol tusta ol óziniń biliktiligimen jáne qyraǵylyǵymen kópshilikti moıyndatty. Aıtýly mamannyń jetekshiligimen sol jyly bizdiń jigitter Dýshanbede uıymdastyrylǵan Azııa chempıonatyna attandy. Komanda tolyq quramda bolmasa da, tamasha óner kórsetip qaıtty. Tájikstannyń bas shaharynda Ánýar Muzafarov, Dıdar О́telbaev jáne Álı Ahmedov bas júldeni oljalasa, Ertýǵan Zeınýllınov fınalda utyldy. Sáken Bıbosynov pen Bekbolat Quramysov qola medaldy moıyndaryna ildi. Jalpykomandalyq esepte ekinshi oryn aldy.
Kóp keshikpeı Taılandtyń Chıang-Maı qalasynda álem birinshiliginiń jalaýy jelbiredi. Bul jarysta Dıdar О́telbaev, Álı Ahmedov jáne Nursultan Amanjolov altyn tuǵyrǵa kóterildi. Bekbolat Quramysov kúmispen kúptelse, Ertýǵan Zeınýllınov, Rahat Marjyqbaev jáne Nazym Ishanova qolaǵa qol sozdy. Komandalyq esepte jerlesterimiz úshinshi satyǵa taban tiredi.
2018 jyly Reseıdiń Elısta qalasynda uıymdastyrylǵan álem chempıonatynda Abylaı Qýandyqov qarsylas shaq keltirmese, Bekbolat Quramysov taǵy da kúmis aldy. Al Erjan Ordabaev qola júldeni enshiledi. Qalmaqııada bizdiń komanda úzdik bestiktiń qatarynan kórindi. Mine, stýdentter arasyndaǵy dúbirli dodalarda Dastan Sádýaqasov baptaǵan Qazaqstannyń stýdentter quramasy qysqa ǵana merzim ishinde osyndaı tabystarǵa qol jetkizdi.
Qazirgi kezde Qazaqstan Respýblıkasynyń eńbek sińirgen jattyqtyrýshysy Dastan Tileýbaıuly Sádýaqasov Qazaq sport jáne týrızm akademııasynda eńbek etip júr. Sonymen qatar ol óziniń birneshe shákirtin kásipqoı rıngke shyǵaryp, sporttyń bul túrin órkendetýge barynsha atsalysýda. Aldaǵy ýaqytta solardyń biri asa iri halyqaralyq dodalarda daralanyp jatsa, esh tańdanbaımyz. О́ıtkeni Dastandaı bilikti bapkerdiń tárbıesin kórgen bylǵary qolǵap sheberiniń alar asýlary bıik bolýǵa tıis.
