Jalpy elimizde jazǵy sport túrlerinen álem chempıonaty jıi ótip jatady, al qysqy sport túrlerinen tek Álem kýbogy jarysy uıymdastyrylǵany bolmasa, álemdik doda tuńǵysh ret ótkizilip otyr. Buǵan deıin 2019 jyly Alataý baýraıynda mogýldan alǵash ret Álem kýbogy jarysy ótse, 2020 jyly Almatyda frıstaıl-akrobatıkadan Álem kýbogy kezeńi uıymdastyryldy. Týrnır Oi-Qaragai Lesnaya Skazka kýrortynda ótip, sportshylar medal men reıtıngtik upaı úshin baryn saldy. Atalǵan básekede mogýldan Iýlııa Galysheva top jarsa, akrobatıkadan Janbota Aldabergenova úzdikter qataryna engen bolatyn. Halyqaralyq shańǵy sporty túrleri federasııasy Qazaqstan álemdik básekeni joǵary deńgeıde uıymdastyrǵanyn atap ótip, joǵary baǵa bergen edi.
Halyqaralyq shańǵy sporty túrleri federasııasynyń osyndaı senimine ıe bolǵan Qazaqstanǵa atalǵan federasııa frıstaıl-mogýl jáne frıstaıl-akrobatıkadan bıylǵy álem chempıonatyn ótkizýdi senip tapsyrdy. Taǵy bir aıta keterligi, bul – jaı ǵana kezekti álem birinshiligi emes, 2022 jyly Beıjińde ótetin Olımpııa oıyndaryna upaı beretin mańyzdy jarystyń biri.
Jarystyń ashylý saltanatynda Halyqaralyq shańǵy federasııasynyń dırektory (FIS) Andrea Rınaldı: «Pandemııa kezinde, osyndaı qıyn sátte álem chempıonatyn ótkizý týraly usynyspen sizderge júgingenimde, oń jaýap alamyn dep úmittengenimdi atap ótkim keledi. Qıyn kezeńde jyldam sheshim shyǵaryp, osyndaı erekshe jaǵdaıda úlken dárejede daıyndalǵandaryńyzdy joǵary baǵalaımyn», degen bolatyn.
Frıstaıl-mogýl boıynsha uıymdastyrylǵan jarystyń alǵashqy kúninde talaı álemdik dodada atoı salyp júrgen eki birdeı otandasymyz – Iýlııa Galysheva men Pavel Kolmakov tuǵyrdyń bıik satysynan kórindi. 2019 jyly AQSh-tyń Park-Sıtı qalasynda uıymdastyrylǵan kezekti álem chempıonatynda top jarǵan Iýlııa Galysheva óz jerimizde ótken dodada kúmis júlde oljalady. Fınaldyq básekede otandasymyz Olımpıada chempıony, Álem kýbogy kezeńderiniń kóshbasshysy fransııalyq Perrın Laffonǵa ese jiberip, 79.52 upaımen ekinshi oryndy qanaǵat tutty. Laffon fınalda 82.11 upaı aldy. Úshtikti 79.41 upaıǵa qol jetkizgen reseılik Anastasııa Smırnova túıindedi.
Jarystan keıin jýrnalısterge bergen suhbatynda Iýlııa Galysheva jeńis tuǵyryna kóteriletinine senimdi bolǵanyn, alaıda bolmashy ǵana qateliginiń kesirinen altynnan aıyrylyp qalǵanyn aıtty.
El qorjynyna ekinshi medaldy 2015 jyly Ispanııada ótken qysqy Ýnıversıada da top jarǵan otandasymyz Pavel Kolmakov saldy. Fınaldyq saıysta 82.23 upaı enshilegen ol mansabynda alǵash ret álem birinshiliginiń qola júldesine qol jetkizdi. Bul synda kanadalyq Mıkael Kıngsberı álem chempıony atansa, kúmis medaldy fransııalyq Bendjamen Kavet ıelendi.
Ekinshi jarys kúnine josparlanǵan paralleldi mogýldan áıelder arasyndaǵy doda da bizdiń sportshylar úshin jemisti aıaqtaldy. Byltyr Shveısarııada ótken paralleldi mogýldan Eýropa kýbogynda jasyndaı jarqyldap, altyn júlde jeńip alǵan 15 jastaǵy jerlesimiz Anastasııa Gorodko bul joly alǵash ret úzdik úshtikke endi. Kishi fınalda Gorodko kanadalyq Sofıa Gegnonmen jarysyp, qarsylasynan oq boıy ozyq boldy. Altyn júldeni reseılik Anastasııa Smırnova, kúmisti onyń otandasy Anastasııa Lazarenko ıelendi. Osylaısha, Anastasııa Gorodko frıstaıl-mogýldan Qazaqstan komandasynyń úshinshi medalin jeńip aldy.
Búgin frıstaıl-akrobatıka boıynsha álem birinshiliginiń sońǵy kúni ótedi. Bul synda el namysyn jýyrda ǵana AQSh-taǵy North American Cup týrnırinde top jarǵan Sherzod Hashırbaevtan bólek, Roman Ivanov, Ildar Batrýdınov, Janbota Aldabergenova, Aqmarjan Qalmurzaeva jáne Aıana Joldas qorǵaıdy.
