QR Indýstrııa jáne ınfraqurylymdyq damý, QR Ekologııa, geologııa jáne tabıǵı resýrstar, QR Syrtqy ister mınıstrlikteriniń, "Aurora Minerals Group" MK, "Rio Tinto", AIX, "Qazmyrysh" AQ ókilderi sharany onlaın formatta ótkizedi.
Jyl saıynǵy PDAC konferensııasy - aǵymdaǵy máseleler, perspektıvalyq naryqtar, salalyq úrdister jáne jańa tehnologııalar talqylanatyn álemdik taý-ken óndirý salasy úshin jetekshi is-shara. Kórme álemniń ár buryshynan ınvestorlardy, sarapshylardy, taý-ken salasynyń jetekshilerin, geologtar men memlekettik qyzmetshilerdi tartady.
"Kazakhstan Day" aıasynda Qazaqstannyń memlekettik organdary men ulttyq kompanııalarynyń ókilderi konferensııa qatysýshylaryna elimizdiń mıneraldyq resýrstary naryǵynyń bolashaǵy, ınvestorlar men bıznes úshin jańa múmkindikter, zańnamadaǵy jańalyqtar, sondaı-aq ınvestorlardy qoldaý sharalary men Qazaqstan naryǵyndaǵy jumys erejeleri týraly aıtyp berdi.
Konferensııada QR Indýstrııa jáne ınfraqurylymdyq damý vıse-mınıstri Rýslan Nurashuly Baımıshev batys-avstralııalyq modelge negizdelgen jańa zańnamany iske asyrýdyń qysqa kezeńinde Qazaqstanda geologııalyq barlaý salasynda kompanııalar damyp kele jatqanyn atap ótti. Birinshi kezekte, bul lısenzııa alý prosesin aıtarlyqtaı ońaılatýmen baılanysty. Máselen, 2 jyl ishinde 1200-den astam jer qoınaýyn paıdalaný quqyǵy berildi.
QR Indýstrııa jáne ınfraqurylymdyq damý mınıstrliginiń ókilderi memlekettik jer qoınaýy qoryn basqarý baǵdarlamasy aıasynda barlaý úshin el aýmaǵynyń 750 000 sharshy shaqyrymnan astam jer qoınaýy berilgenin habarlady. Búgingi tańda tek 8% lısenzııalanǵan. Qazaqstan aýmaǵynyń basym bóligi áli de paıdaly qazbalardy izdeý jáne óndirý sharalaryn uıymdastyrýǵa qoljetimdi. Geologııalyq barlaýǵa lısenzııa berý rásimi 10 jumys kúninen aspaıdy.
Geologııalyq barlaý jumystarynyń tez artýyna baılanysty elimizde paıdaly qazbalardy barlaý qyzmetteri aıtarlyqtaı ósti. Jer qoınaýyn zertteý naryǵynda burǵylaý, geofızıkalyq, konsaltıngtik jáne saraptamalyq qyzmetter kórsetetin jańa jergilikti ıýnıorlyq kompanııalar, servıstik kompanııalar paıda boldy. Budan basqa, paıdaly qazbalardy barlaý jáne óndirý úshin eń zamanaýı tehnologııalary bar jetekshi álemdik taý-ken óndirýshi kompanııalar Qazaqstan naryǵyna qyzyǵýshylyq tanytýda.
Munyń bári el turǵyndary úshin paıdaly. Saladaǵy belsendiliktiń jandanýy jańa jumys oryndarynyń ashylýyna jáne jalaqynyń ósýine áser etedi.
