El Prezıdenti Qasym-Jomart Toqaev «Táýelsizdik bárinen qymbat» atty maqalasynda balalar ádebıetine erekshe mán berip: «Til ıgerý úshin balalar ádebıetiniń atqaratyn róli zor. Sondyqtan qazaq qalamgerleriniń úzdik shyǵarmalaryna qosa, balalarǵa arnalǵan shetel jazýshylarynyń da tańdaýly týyndylaryn aýdaryp, kóptep basyp shyǵarýdy jáne taratýdy qolǵa alǵan jón» dep atap ótken bolatyn. Soǵan oraı 2021 jyl – balalar men jasóspirimderdiń kitap oqýyn qoldaý jyly bolyp jarııalanǵan edi. Osy maqsatta «Folıant» baspasy qazirgi urpaqtyń pshologııasyna tán, tálim-tárbıelik mańyzy bar sapaly týyndylardy basyp shyǵarýdy, álemdik ádebıette orny bar shyǵarmalardy aýdarýdy qolǵa alyp otyr.
Is-sharaǵa Shvesııa Koroldiginiń Qazaqstan Respýblıkasyndaǵy Tótenshe jáne ókiletti elshisi Mats Foıer, jazýshy, Qazaqstannyń eńbek sińirgen qaıratkeri Sáýle Dosjan, qalamger Baıanǵalı Álimjanov, balalar aqyny Serikbol Hasan jáne t.b. zııaly qaýym ókilderi qatysty.
Eki el arasyndaǵy shyǵarmashylyq baılanystyń bolashaǵynan úlken úmit kútetinin aıtqan Shvesııa Koroldiginiń Qazaqstan Respýblıkasyndaǵy Tótenshe jáne ókiletti elshisi Mats Foıer atalǵan jobanyń «Kulturrådet» boıynsha Shved keńesiniń grantymen iske asyrylǵanyn jetkizdi. «Ataqty ádebı keıipkerdiń qazaq tilinde sóılegenine qýanyshtymyn. Shvesııa balalarynyń bári Uzynshulyq Pıppıdi jaqsy biledi. Tipti, bul kitapty oqý úlkenderge de paıdaly. Ol árbir adamǵa, qoǵamǵa, aınalasyna neǵurlym jeńil, erkin qaraýǵa úıretedi», dedi elshi.
Kitap aýdarmashysy Mıra Sembaıqyzy tárjima jumystaryna úsh aı ýaqyt ketkenin aıta kele: «Aýdaryp bolǵannan keıin de redaksııadan ótkizip, ábden tekserdik. Balalar oqyǵanda túsiniksiz uǵymdar, qıyn sóılemder kezdesip qalmasyn dep sóılemderdi barynsha jeńil tilmen berýge tyrystym», dedi.
Astrıd Lındgren, IýNESKO uıymynyń málimeti boıynsha, álemniń eń kóp aýdarylatyn jıyrma avtory arasynda 18-orynda – Fedor Dostoevskıı, ertegi patshasy Andersenmen qatar tur.
76 jyl buryn jaryq kórgen «Uzynshulyq Pıppı» soǵystan keıingi shvedtik balalar úshin bostandyq, ómirge degen súıispenshilik sımvolyna aınaldy. Avtor balalarǵa qarsy zorlyq-zombylyqty toqtatý men olarǵa degen qurmet sezimin qalyptastyrý qajettiligin qoǵamǵa jetkizý úshin barlyq múmkindikti paıdalandy. Barlyq kitaptarynan «erkin tárbıeleý ata-anaǵa degen qurmettiń joqtyǵyn bildirmeıdi, bul ata-ananyń balaǵa degen qurmetin bildiredi», «Balańyzǵa shyn kóńilmen mán berińiz», «Balańyzdy qoldańyz», «Balańyzdy tyńdaýdy úırenińiz», «Balańyzben oınańyz», «Balańyzben sóılesińiz» jáne eń bastysy «Balańyzǵa qol kótermeńiz» degen ıdeıa baıqalady.
Al bas keıipker Pıppı – balalardyń kúsh pen ıgilik, baılyq pen jomarttyq, bostandyq pen táýelsizdik armandarynyń sımvoly. Al úlkender kerisinshe, Pıppıdi túsinbeıdi. Dárihanashy, mektep muǵalimi, sırk dırektory, tipti Tommı men Annıkanyń anasy da Pıppıdi ózgertýge, qaıta tárbıeleýge tyrysady. Alaıda eshkim Pıppıge qalamaǵanyn jasata da, mindetteı de almaıdy. Pıppı týraly kitaptar – jaqsylyqqa qushtarlyqtyń sımvoly syndy.
