Elbasy kitaphanasynyń dırektory Baqytjan Temirbolat sharanyń shymyldyǵyn túrip, qatysýshylardyń aldynda sóz sóıledi. Ol 30 jyl buryn Qazaqstan táýelsizdikke qol jetkizip, óziniń biregeı jolyn tańdap, kez kelgen salanyń áleýetin damytý úshin barlyq múmkindikterdi paıdalanǵandyǵyn atap ótti. Sondaı-aq, B.Temirbolat Elbasy kitaphanasynyń Qazaqstan Táýelsizdiginiń 30 jyldyǵyna arnalǵan «Qazaqstan maqtanyshy» atty aýqymdy jobasy týraly aıtyp berdi. Joba aǵymdaǵy jyldyń 8 naýryzynda «Bolashaq» halyqaralyq baǵdarlamasynyń 30 úzdik túlekterimen ótken ınteraktıvti kezdesýden bastaý aldy.
«Qazaqstannyń maqtanyshy» jobasy el maqtanyshyna aınalǵan daryndy otandastarymyzdyń ómir joly, eren eńbegi men tabysqa jetý tásilderi týraly jaqynyraq bilý úshin qolǵa alyndy. Búgingi is-shara dene shynyqtyrý jáne sport salasyndaǵy memlekettik saıasatty, Qazaqstan Respýblıkasynyń Tuńǵysh Prezıdenti – Elbasy N.Á. Nazarbaevtyń salaýatty ult ıdeologııasyn qalyptastyrý isindegi bastamalary men ıdeıalaryn nasıhattaý jáne túsindirý jolynda jańa serpin beretinine senimdimin», dedi B.Temirbolat.
Dańqty qazaqstandyq boksshy, 2005 jáne 2007 jyldardaǵy álem chempıony, 2012 jylǵy Olımpıada chempıony, búginde QR Mádenıet jáne sport mınıstrligi Sport jáne dene shynyqtyrý isteri komıtetiniń tóraǵasy Serik Sápıev sportshylarǵa arnalǵan dańq murajaıynyń ashylýy elimizdiń týyn kókte jelbiretetin jas batyrlardyń rýhyn arttyratynyn aıtty.
Ary qaraı búgingi jıyn aıasynda Qazaqstan Respýblıkasynyń Tuńǵysh Prezıdenti – Elbasy kitaphanasy men Qazaqstan Respýblıkasy Mádenıet jáne sport mınıstrliginiń Sport jáne dene shynyqtyrý isteri komıteti arasynda yntymaqtastyq týraly Memorandýmǵa qol qoıyldy. Elbasy kitaphanasynyń dırektory Baqytjan Temirbolat pen QR MSM Sport jáne dene shynyqtyrý isteri komıtetiniń tóraǵasy Serik Sápıev qujatqa qol qoıdy.
Odan keıin Olımpıada chempıondary men Qazaqstannyń ataqty sportshylarynyń jeke zattaryn Elbasy kitaphanasynyń mýzeıine syıǵa tartý rásimi ótti. Qazaqstandyq mánerlep syrǵanaýshy Elızabet Tursynbaevanyń ákesi Baıtaq Tursynbaev álem chempıonatynda qyzynyń tórttik salhov jasap, Qazaqstandy álemdik qysqy sport tarıhyna qosqan konkıin tabystady.
Serik Sápıev 2009 jylǵy álem chempıonatyna kıip barǵan formasyn syıǵa tartty. Iýrıı Melnıchenko is-shara uıymdastyrýshylaryna sporttaǵy mansabyndaǵy jeńip alǵan kóptegen kýboktarynyń birin syı etti. Álııa Iýsýpova halyqaralyq týrnırden músinsheni, ataýly medal men taıaqshasy bar lentany tabys etti. Ilıa Ilın murajaı kolleksııasyn 2014 jylǵy Altyn medalmen tolyqtyrdy. Danııar Eleýsinov mýzeıge óziniń altyn boks qolǵabyn tapsyrdy. Gúzel Manıýrova jeńisti trıkosyn berdi. Beıbit Ystybaev 2015 jyly Elbasynyń ózi tapsyrǵan belbeýdi tapsyrdy. Móldir Mekenbaeva 2019 jyly Mońǵolııada ótken Azııa chempıonatynyń medaldaryn tartý etti. Darhan Nortaev Qazaqstan djıý-djıtsý qaýymdastyǵynyń atynan Álem chempıonatynyń Kýbogyn tapsyrdy. Sonymen qatar, is-sharaǵa baık jáne basqa da oljalaryn Elbasy kitaphanasyna usynǵan Qazaqstan baıkerler qaýymdastyǵynyń prezıdenti Dmıtrıı Petrýhın de qatysty.
Is-sharada alyp kúsh ıesi, kúsh qoldanatyn nómirler arasyndaǵy álemniń tórt dúrkin rekord ıesi, Qajymuqan Muńaıtpasov pen Balýan Sholaqtyń murasyn jalǵastyrýshy, QR Mádenıet jáne sport mınıstrliginiń elimizdegi kúsh mádenıetin damytý jónindegi ókili Sergeı Syrýlnıkov ta boı kórsetti. Qonaqtardyń aldynda ol kúsh ónerin pash etip, at taǵasyn maıystyrdy. Keıinnen taǵany mýzeıdiń qoryna ótkizdi.
«Men qazaq palýandarynyń kúsh ónerin jalǵaǵan sport túrin teginnen tańdamadym. О́ıtkeni, bul Qazaqstan mádenıetiniń ajyramas bóligi der edim. О́kinishke qaraı, qazirgi tańda kúsh sportynyń murasy birjola joǵalyp barady. Búgingi meniń negizgi mindetim – Qazaqstannyń kúsh ónerin jańǵyrtý, ary qaraı nyǵaıtý. Jastar óz eliniń batyrlaryn, batyrlyqtyń jolyn, ulttyq rýh pen tarıhtyń qalyptasýyn jetik bilýi kerek. Qoryta aıtqanda, men úshin bul is-shara óte mańyzdy, óıtkeni qalyń jurtshylyqty bizdiń palýandarymyzdyń murasymen taǵy da bir tanystyryp, olardyń ónerlerin kórsetýge múmkindik alamyn», deıdi ol.
Qazaqstandyq boksshy, álemniń, Azııanyń birneshe dúrkin chempıony, Táýelsizdiktiń qurdasy Danııar Eleýsinov Rıo-de-Janeıroda ótken 2016 jylǵy Olımpıada oıyndaryndaǵy jeńisti jekpe-jeginiń estelikterimen bólisti: «Olımpıada aýylynda keýdege taǵylǵan medalmen baqyttan basym aınalyp, asyr salǵanymdy eshqashan umytpaspyn. Týystarymnan, dostarymnan, áriptesterimnen quttyqtaýlar qabyldap, tóbem kókke jetti. Men sol kúnge, sol maqsatqa uzaq ýaqytymdy qıdym, barymdy saldym. Túbinde halyqtyń senimin aqtaı aldym dep oılaımyn. Osy jyly aldaǵy barlyq jeńisterimdi elimizdiń Táýelsizdigine arnaǵym keledi».
Búgingi tańda sport pen sport jetistikteri álemdik órkenıet pen mádenıettiń ajyramas bóligi ekeni anyq. Táýelsizdik jyldarynda Qazaqstan sportshylary túrli deńgeıdegi halyqaralyq jarystarda 60-tan astam olımpıadalyq jáne 700-ge jýyq halyqaralyq jarystardyń medalyn jeńip aldy. Bizdiń elimiz alǵashqylardyń biri bolyp 30 sporttyq alpaýyt elderdiń qataryna endi. Qazaqstan Respýblıkasynda sportty damytý memlekettik saıasattyń mańyzdy baǵyttarynyń biri bolyp qala beredi.
Jıynǵa qatysýshylar sport juldyzdarymen birge qurmet tuǵyryna kóterilip, chempıondardan qoltańba aldy. Aıtýly sharanyń Elbasy kitaphanasynda ótýiniń sımvolıkaly máni bar, óıtkeni dál osy ǵımaratta jastardy salaýatty ómirge shaqyryp, erekshe energııamen bóleıtin ınteraktıvti alań bar. Osy alańda Ilıa Ilın temir kóterse, Serik Sápıev bokstasty. Ekeýi de ózderiniń sıfrly qarsylastaryn tize búktirdi.
Sport-revıý barysynda sportshylar tapsyrǵan jeke zattar men muraǵat materıaldary Elbasy kitaphanasynyń ekspozısııalarynan laıyqty oryn taýyp, jurtshylyqtyń ıgiligine aınalady.
