Batys Qazaqstan oblysynda sońǵy táýlikte qutqarýshylar kúsheıtilgen rejımde jumys jasaýda. Qar jaýyp, qatty soqqan jel kóz kórsetpes boranǵa aınaldy.
17 naýryz kúni 20 saǵat 58 mınýtta Batys Qazaqstan oblysy Tótenshe jaǵdaılar mınıstrliginiń Daǵdarys jaǵdaıynda basqarý basqarmasyna Syrym aýdany, Shaǵyrlyoı kentinen 7 shaqyrym jerde ornalasqan «Ahmetjan» qystaǵynda traktormen jylqy izdeýge shyqqan malshy joǵalyp ketkeni jóninde habar kelip tústi. Eń qıyny, traktor kabınasynda kishkentaı bala da bolǵan eken. Departamenttiń jedel-qutqarý jasaǵy dabyl boıynsha kóterildi. «TREKOL» avtokóligimen izdestirý jumystary arada 4 saǵat ótkende nátıje berdi. Túngi 01 saǵat 10 mınýtta balaly malshy qutqaryldy. Olardyń densaýlyǵyna qaýip joq.
Dál osy kúni 22 saǵat 06 mınýtta Syrym aýdany, Qońyr aýyly aýmaǵynda Samara-Shymkent tas jolynan 10-15 shaqyrym qashyqtyqta Nıva avtokóligi qar qursaýynda qalyp qoıǵany týraly da habar túsken. Qutqarýshylar bul joly da jedel qımyldady. №14 órt sóndirý pýnktiniń qyzmetkerleri oqıǵa ornyna jetip, 5 adamdy qutqardy. Onyń ishinde 1 bala bolatyn. Olar turǵylyqty jeri Qońyr aýylyna jetkizildi.
Osy kúni Syrym aýdany Tasqudyq aýyly shamasynda qalyń qardan júre almaı jolda qalǵan Nıva avtokóliginiń 3 jolaýshysy da qutqarylyp, Jympıty kentiniń jylytý pýnktine jetkizildi.
18 naýryzda túngi 01 saǵat 42 mınýtta Terekti aýdany Aqsoǵym aýyly mańynda, Barbastaý-Inder tas jolynyń 71 shaqyrymynda 3 júk kóligi, 7 jeńil kólik júre almaı, jolda qalǵany anyqtaldy. Qutqarýshylar Aqjaıyq aýylyndaǵy jylytý pýnktine adamdardy jedel túrde evakýasııalady. Qutqarylǵan 10 adamnyń ishinde 6-ýy balalar eken. Avtokólik júrgizýshileri evakýasııadan bas tartqan.
Naýryz aıy bel ortadan asyp ketse de Batys Qazaqstan oblysynda qys taǵynan túser emes. Sondyqtan oblystyq Tótenshe jaǵdaılar departamenti jolaýshylardy qaýipsizdik sharalaryn qatań saqtaýǵa shaqyryp jatyr. «Joldardaǵy jaǵdaı̆ týraly aqparatty «Dármen» mobıldi qosymshasynan alýǵa bolady» deıdi departamenttiń baspasóz qyzmeti.
