Elimizde bastaý alǵan «Týǵan jer» jobasyn qoldaǵan kásipkerler elge paıdaly jumys atqarýda. Máselen, qazirgi kezde Shý aýdany Aqsý aýylynyń týmasy Bolat Tileýjanov aýyldyń ortasynan aýmaǵy 1 gektar bolatyn jerge jalpy quny 30 mln teńgeni quraıtyn saıabaq salyp jatyr. Ol – búginde Shymkent qalasynda sharýasyn dóńgeletip otyrǵan kásipker. Biraq aýyldan shalǵaı júrse de týǵan topyraǵyna degen ystyq yqylasyn, aýyl turǵyndaryna degen qurmetin umytpaǵan.
Bul kúnde zerthanadan saıabaq ishindegi topyraqtyń tıisti qorytyndysy alynyp, Naýryz merekesi qarsańynda alqapqa tal-daraqtar egý jumystary bastalyp ketti. Munda turǵyndar úshin arnaıy sahna men sándi sákiler salynady. Sonymen qatar saıabaqtyń kireberisinde eńseli arka men kúzetshige arnalǵan bólme de bolady. Al jańa saıabaqtyń ishinen balalardyń oıyn alańy da salynady dep josparlanýda. Sondaı-aq bul jerge aýyldan shyqqan belgili azamattar men eńbek erleriniń esimderi jazylǵan eskertkish-taqta da ornatylady. Jańa salynyp jatqan saıabaq el Táýelsizdiginiń 30 jyldyǵyna arnalyp otyr. Aýyldyqtar da kásipkerdiń bul bastamasyna qoldaý kórsetip, alǵys bildirýde. Osy oraıda Bolat Tileýjanov ósken ortasyn órkendetý árbir azamattyń paryzy ekenin, atalǵan saıabaqqa 600 túp dekoratıv aǵashynyń kósheti egiletinin, búginde sonyń 400-den asa kósheti otyrǵyzylǵanyn atap ótti.
Aǵash otyrǵyzý jumysyna aýyl turǵyndary men jergilikti atqarýshy bıliktiń ókilderi jáne demeýshiniń týystary túgelge derlik qatysty. Shý aýdanynyń ákimi Nurjan Kalenderov ózi bastap aǵash kóshetin otyrǵyzyp, aldaǵy ýaqytta saıabaqtyń ári qaraı damýyna tıisti kómek kórsetiletinin jetkizdi.
«Qoly ashyqtyń – joly ashyq» degen jaqsy sóz bar halqymyzda. Kemel eldiń kelisti keleshegi, ulaǵatty bolashaǵy degende isher asyn jerge qoıatyn atpal azamattar aýdanymyzda jeterlik. Jaqsy adamnyń jınaǵan dúnıesi emes, jaqsy atynyń qalatyny osyndaıdan kórinedi. Aýyldaǵy ıgilikti ister týǵan jerine jaýapkershilikpen qaraıtyn, sol óńirdiń topyraǵynan túlep ushqan tabysty turǵyndardyń arqasynda atqarylatyn jumystar», deıdi aýdan ákimi.
«О́ńirimizdiń oıdaǵydaı damýynyń kepili – patrıotızm men ár turǵynnyń týǵan eliniń damýyna qosqan úlesi. Saıabaqty abattandyrý maqsatynda josparlanǵan jumystar tolyǵymen aıaqtalsa, Táýelsizdigimizdiń 30 jyldyq mereıtoıyna oraı nysandy aýyl ákimshiliginiń ıeligine tartý etemin», deıdi kásipker.
Aqsýlyqtardyń jańa saıabaqty tamashalaıtyn kúni alys emes. Mesenattyń ákesi Baqytjan Tilejanov ta kezinde oıylǵan joldy óz qarjysyna jóndetip, elge paıdasyn tıgizgen qadirli qarııa eken. Aýyldyqtar búginde bul bastamaǵa dán rıza. «Munyń bári de – Táýelsizdiktiń bizge bergen syıy. Jeke qarajatyn jumsap, bizge jańa saıabaq salyp berip jatqan azamatqa alǵys aıtamyz», deıdi aýyl turǵyndary.
Jambyl oblysy
