Tujyrymdamanyń maqsaty – azamattar men olardyń ál-aýqaty basty qundylyq bolatyn memlekettik basqarýdyń servıstik jáne «adamǵa baǵyttalǵan» modeline kóshý. Qazirgi tańda memlekettik basqarý salasyn reformalaý jumystarymen aınalysyp jatqan Strategııalyq josparlaý jáne reformalar agenttiginiń tóraǵasy Qaırat Kelimbetov qujatty egjeı-tegjeı túsindirip, onyń negizgi jańalyqtarymen bólisti.
– Tujyrymdama memlekettik apparatty memlekettik basqarýdyń servıstik jáne «adamǵa baǵdarlanǵan» modeline, ıaǵnı, bıýrokratııalyq modelden proaktıvti qyzmetke kóshýine baǵyttaıdy, dedi agenttik tóraǵasy Qaırat Kelimbetov.
Memlekettik saıasattardy qalyptastyrý men iske asyrý kezinde memlekettik apparat pen memlekettik qyzmetshiler memlekettik basqarýdyń bes negizgi qaǵıdatyn basshylyqqa alatyn bolady. Memleket «halyq únine qulaq asatyn», tıimdi, qoǵam aldynda esep beretin, kásibı jáne pragmatıkalyq bolýy qajet.
Osy qaǵıdattarǵa súıený úshin memlekettik apparat toǵyz negizgi mindetti oryndamaq. Atap aıtqanda, olar – klıentke baǵdarlanǵan jáne ashyq memlekettik apparatty qalyptastyrý, strategııalyq jáne bıýdjettik josparlaý, sondaı-aq reformalar júrgizý tásilderin jetildirý, ońtaıly jáne tıimdi memlekettik apparatty qalyptastyrý, azamattardyń qajettilikterine negizdelgen proaktıvti memlekettik qyzmetterge kóshý, adamı resýrstardyń sapasyn jaqsartý jáne memlekettik apparatty kásibılendirý, tıimdi, ońtaıly jáne ashyq kvazımemlekettik sektordy qalyptastyrý, jergilikti ózin-ózi basqarýdy odan ári jetildirý, bıznesti damytýǵa qolaıly jaǵdaı jasaý, memlekettiń servıstik modelin qurý úshin sot júıesi men quqyq qorǵaý júıesin transformasııalaý.
Tarqatyp aıtar bolsaq, memlekettik qyzmetter Memlekettik basqarýdy damytý tujyrymdamasy aıasynda sıfrlyq formatqa kóshýdi jalǵastyrady. Memlekettik apparattyń qyzmeti proaktıvti bolyp, halyqtyń muqtajdyqtaryna saı qaıta formattalady. Áleýmettik sala uıymdaryna qoǵamdyq monıtorıng júrgizýge múmkindik beretin «qoǵamdyq mańyzy bar qyzmet» uǵymyn engizý josparlanýda.
Qyzmetter barynsha qysqa merzimde eksaýmaqtyq (turatyn jerine baılanbaı), proaktıvtilik jáne kompozıttik qaǵıdalary boıynsha kórsetiletin bolady. Bul rette kompozıttik qyzmetter alýshylarǵa bir ótinish negizinde usynylady.
Qazaqstandyqtar qandaı da bir suraý salýsyz memlekettik qyzmetti alý qajettiligi nemese múmkindigi týraly avtomatty túrde habarlama almaq. Keı jaǵdaılarda qyzmetter proaktıvti túrde kórsetiledi.
Sonymen qatar, Memlekettik basqarýdyń «adamǵa baǵdarlanǵan» modelinde eldegi quqyq ústemdigi men qaýipsizdikti qamtamasyz etýge úndeıtin sot jáne quqyq qorǵaý júıelerine erekshe nazar aýdarylatyn bolady. Qoǵamnyń sottarǵa degen senimin nyǵaıtý úshin sot bıliginiń táýelsizdigin qamtamasyz etýge baǵdarlanǵan sot ákimshiligin júrgizýdiń qaǵıdalyq jańa amaldary qalyptastyrylmaq.
Tolyqqandy táýelsiz sot bıligi adam men qoǵam tarapynan quqyqtar men múddelerdi iske asyrýdy sapaly qamtamasyz etý úshin barlyq deńgeıdegi atqarýshy bıliktiń minez-qulqy men qyzmetiniń modelin qaıta qurylatyn bolady. Investorlar tarapynan memleketke senimdi arttyrý men olardy qorǵaý jónindegi jumystary odan ary jalǵastyrylmaq. Osy turǵyda AHQO Sotynyń kommersııalyq kelisimsharttar boıynsha sharttyq talaptardy qaraý múmkindigi paıdalanylady.
Qazaqstannyń sot korpýsy bıliktiń basqa tarmaqtarynyń qatysýynsyz jańartylady jáne qalyptasady. Sýdıalardy irikteý barysy BAQ-ta qatar jarııalanady.
Quqyq qorǵaý organdarynyń jumysyn kúsheıtý úshin qyzmetke kirý jáne qyzmet babynda ilgeriletý kezinde merıtokratııa qaǵıdasyn qamtamasyz ete otyryp, kadrlardy irikteý sapasy artady.
Agenttik tóraǵasynyń aıtýynsha, tujyrymdamanyń maqsattary men mindetterine qol jetkizý úshin ár baǵyt boıynsha birqatar naqty bastamalar qarastyrylǵan. Qujattyń sapaly oryndalýy memlekettik basqarýdyń tıimdiligin, memlekettik apparattyń ashyqtyǵy men eseptiligin arttyrýǵa, memleket pen azamattar arasyndaǵy baılanysty jaqsartýǵa, halyqtyń memleket ınstıtýttaryna degen senimin nyǵaıtýǵa yqpal etýi tıis.
