Eske sala keteıik, 25 naýryzda saǵat túngi 02.00 shamasynda «Otbasy úlgisindegi «Atameken» balalar aýylynda» tárbıelenip júrgen 15-16 jastaǵy úsh jasóspirim qyz belgisiz sebeppen atalǵan meken-jaıdan shyǵyp ketken. Sodan beri habarsyz qalǵan. Olardyń habarsyz ketýine baılanysty izdestirý jumystary júrgizilýde. «Jasóspirimderdiń qaýipsizdigi úshin izdeý sharalaryna erikti azamattar da jumyldy. Jasóspirim qyzdar áli de tabylǵan joq. Osyǵan baılanysty izdeý jumysyna belsendi azamattardy, janashyr eriktilerdi shaqyramyz», dep jazylǵan Qyzylorda oblystyq bilim basqarmasy taratqan habarlamada. Qyzylorda qalalyq polısııa basqarmasynyń habarlaýynsha, osy maqsatta oblys ortalyǵyndaǵy kópqabatty úılerdiń shatyrlary, saıajaılar, tastandy úıler men qurylysy bitpegen ǵımarattar, oıyn-saýyq ortalyqtary men jaldamaly páterler tekserilýde. Olardyń fotosýretteri kórsetilip, surastyrý jumystary júrgizilýde. Bul jumystar oblystyq polısııa departamenti basshylyǵynyń baqylaýynda.
