Qazaqstan boks federasııasynyń menedjeri Meıram Nurtazın jarystardy ótkizý máseleleri jónindegi komıssııa quramyna kirdi, al Sıdneı olımpıadasynyń chempıony, Olımpıadalyq daıyndyq ortalyǵynyń dırektory Ermahan Ybraımov chempıondar men ardagarler komıssııasynyń múshesi boldy.
Jańa taǵaıyndalǵan qazaqstandyqtarǵa hatty AIBA prezıdenti Ýmar Kremlev joldady. Ol óz joldaýynda qazaqstandyqtardyń biligi men tájirıbesi uıymdy damytýǵa qosqan eleýli úles bolatynyn aıtty. Sondaı-aq ol uıymnyń jańa múshelerimen erterek tanysyp, jumysty bastaýdy kútip otyrǵanyn aıtqan.
Qazaqstandyqtardyń jańa qyzmetke taǵaıyndalýyna oraı Azııalyq boks konfederasııasy da quttyqtaý joldady.
Bul 2018-2019 jylǵy úzilisterden keıin AIBA-nyń basqarýshy organdaryna taǵaıyndalyp otyrǵan alǵashqy qazaqstandyqtar. 2014-2017 jyldar aralyǵynda atalǵan uıymda Qazaqstannyń 6 azamaty jumys istegen. 2019 jyly uıymda júrgizilgen reformalardan keıin komıssııalardyń barlyǵy taratylyp, qazir qaıta jasaqtalyp jatyr.
