Ásel Qalyqovanyń aıtýynsha, Almatyda vırýsty qaıta juqtyrýdyń 10 jaǵdaıy tirkeldi. Olarda byltyrǵy jyldyń jazynda koronavırýs ınfeksııasy sımptomsyz ótken. Endi klınıkalyq belgimen ótip jatyr.
«Bul jaǵdaı boıynsha málimetter biryńǵaı statıstıkalyq esepke alynady», dedi Ásel Qalyqova.
Sonymen qatar ol aldaǵy ýaqytta qaladaǵy saýda úıleri men bazarda halyqqa vaksına salý jumysy qalaı júrgiziletinin aıtty.
«Qazir halyqty vaksınasııalaý boıynsha qalanyń bas memlekettik sanıtar dárigeriniń qaýlysy ázirlenip jatyr. Onda vaksına salýdyń algorıtmi belgilenedi. Vaksına saldyrýǵa kelgen adamda ózimen birge jeke kýáligi nemese pasporty bolý kerek. Al 21 kún ótken soń ol adam alǵash vaksına saldyrǵan emhanasyna nemese ýaqytsha ekpe salý ornyna qaıta barý kerek», deıdi ol.
