Vedomstvo basshysy óńirdegi tabıǵat paıdalanýshy iri kásiporyndardy aralap, óńir ekologııasyn jaqsartý sharalarymen tanysty.
Mınıstr «Qazhrom» TUK-na qarasty Aqtóbe temirqorytpa zaýyty basshylyǵymen kezdesýinde osy kásiporynnyń óńirdegi iri lastaýshylardyń biri ekenin aıtyp ótti. О́ıtkeni, Aqtóbe qalasy boıynsha aýaǵa jiberiletin zııandy zattar kóleminiń 50%-y atalǵan kásiporynǵa tıesili.
2021 jyldyń aqpan aıynda kásiporyn mınıstrlikten keshendi ekologııalyq sharalardy júrgizýge ruqsat alyp, óndiristi eń ozyq qoljetimdi tehnologııalarǵa kóshirýdi josparlap otyr. Ol úshin kásiporyn zaýyt qondyrǵylaryna súzgiler ornatý arqyly aýaǵa jiberiletin zııandy zattar kólemin 2024 jylǵa deıin 30%-ǵa azaıtýdy josparlap otyr. Mınıstr zaýyt basshylyǵyna eń úzdik qoljetimdi tehnologııalarǵa kóshý sharalaryn tezdetýdi tapsyrdy. Sonymen birge hromshpınel untaǵy qaldyqtaryn kómý jumystaryn da jedel túrde qolǵa alýdy mindettedi. Jalpy «Qazhrom» transulttyq kompanııasy ótken jyly ekologııalyq sharalarǵa 11,5 mlrd teńge bólse, onyń 7 mlrd teńgesi Aqtóbe óńirine baǵyttalǵan.
Osydan soń M. Myrzaǵalıev ekologııalyq turǵydan qaýipti iri óndiris oryndarynyń qataryndaǵy Aqtóbe hrom qosyndylary zaýytyna baryp, kásiporyn aýlasynda jınalyp qalǵan óndiris qaldyqtaryn keshendi kómý josparymen tanysty. Osy kásiporyn 2020 jyly jańa tehnologııalardy qoldaný arqyly las shyǵaryndylar kólemin 1,4 esege azaıtty.
«2025 jylǵa deıin zaýyt emıssııany azaıtý úshin aýaǵa shyǵarylatyn shań tutqysh súzgiler ornatýdy mindetine aldy. Bul jumysty múmkindiginshe tezdetý kerek», dedi mınıstr.
Aqtóbe qalasynyń ekologııalyq jáne sanıtarlyq-epıdemıologııalyq ahýalyna tozyǵy jetken kárizdik-tazalaý qurylǵylary beketi de áserin tıgizýde. Maǵzum Myrzaǵalıev «Aktobesu-energygroup» AQ-yna qarasty kárizdik-tazalaý qurylǵylary ortalyǵynda boldy. Bul jerde mınıstr óńir basshysy Ońdasyn Orazalınmen birge jańa kárizdik-tazalaý beketi qurylysy jóninde pikir almasty. «Qazirgi kezde bıýdjetten bólingen 420 mln teńgege hımııalyq reagentter qosý arqyly qoqysty tazalaý jumystary júrgizilýde. Mınıstrlik ótken jyly oblys ákimdigimen birlese óńirdiń kúrdeli ekologııalyq máselelerin keshendi sheshýdiń Jol kartasyn qabyldady. Bıylǵy jyldan bastap qorshaǵan ortaǵa keltiriletin zııandy qaldyqtar kólemin azaıtý jumystary osy Jol kartasy sheńberinde iske asyrylady», dedi Maǵzum Myrzaǵalıev.
Aqtóbe oblysy
