Jaqynda Qazaqstan Respýblıkasynyń premer-mınıstri Asqar Mamın Batys Qazaqstan oblysynyń keıbir bilim berý uıymdaryna ataý berý jáne olardyń ataýlaryn ózgertý týraly Úkimet qaýlysyna qol qoıdy
Bul qaýlyǵa sáıkes, budan bylaı Batys Qazaqstan oblystyq daryndy balalarǵa arnalǵan mamandandyrylǵan mektep-gımnazııa-ınternaty Abaı esimimen atalatyn boldy.
Aıta keteıik, bul mektep-gımnazııa – túlekteri UBT synaǵynda elimiz boıynsha únemi eń úzdik nátıje kórsetetin maqtaýly mektep.
Ataýy jańarǵan bilim ordalary arasynda Báıterek aýdanyndaǵy 9 aýyldyq mektep te bar. Reseı Federasııasymen shekarada ornalasqan bul aýdanda eldimeken, mekeme-uıymdar ataýlary táýelsizdik talaptaryna sáıkes kelmeıtini buryn da aıtylyp júretin. Mine, endi úkimet qaýlysynan keıin Darııan mektep-gımnazııa-ınternaty – «Abaı atyndaǵy mektep-gımnazııa-ınternaty», Trekın jalpy orta bilim beretin qazaq mektebi – Qadyr Myrza Áli atyndaǵy, Pervosovetsk jalpy orta bilim beretin mektebi – Shoqan Ýálıhanov atyndaǵy, Shapov jalpy orta bilim beretin mektebi – Baýyrjan Momyshuly atyndaǵy, Batýrın jalpy orta bilim beretin mektebi – Talǵat Bıgeldınov atyndaǵy, Novenkıı jalpy orta bilim beretin mektebi – Qasym Qaısenov atyndaǵy, Ýlıanov jalpy orta bilim beretin mektebi – Ilııas Esenberlın atyndaǵy jalpy bilim beretin orta mektep dep atalatyn boldy.
Osy qaýlyda Shyńǵyrlaý aýdanyndaǵy Belogor negizgi mektebi – Aqtaý aýylynyń negizgi bilim beretin orta mektebi, Poltava negizgi orta bilim beretin mektep-balabaqshasy – Ardaq aýylynyń negizgi bilim beretin orta mektep-balabaqshasy bolyp ózgertilgeni de aıtylǵan. Atalǵan aýyldardyń tarıhı ataýyn qaıtaryp alǵanyna birneshe jyl bolǵan edi.
- Bilim ordalaryna óskeleń urpaqqa rýh beretin uly tulǵalarymyzdyń esimin berý jumystary bolashaqta da jalǵasady. Qazirdiń ózinde Qaratóbe aýdanyndaǵy eki mektepti Ǵarıfolla Qurmanǵalıev pen akademık Qajym Jumalıevtiń esimimen ataý týraly usynys tústi. Oral qalasynda da Baýyrjan Momyshuly men Qadyr Myrza Áli esimin surap otyrǵan mektepter bar. Qazir qujattary qattalyp, tıisti rásimderi jasalyp jatyr, deıdi Batys Qazaqtan oblystyq tilderdi damytý basqarmasynyń bas mamany Izbasar Jumaǵalı.
