Buryn Elbasy N.Nazarbaev bekitken 2018-2021 jyldarǵa arnalǵan Keshendi jospar óńirdiń damýyna oń áserin tıgizgen bolatyn. О́tken úsh jylda óńirde, jaman indettiń kesirine qaramaı, jalpy óńirlik ónim 34, ınvestısııa 50, aýylsharýashylyǵy ónimi 54, óńdeý ónerkásibi 37 paıyzǵa artqan. Bıznestiń óndiristegi úlesi 5 paıyzǵa ulǵaıǵan. Júzdegen áleýmettik máseleler sheshildi. Bul iste oblys basshylyǵy men onyń komandasynyń iskerligin de aıtpaı ketýge bolmaıdy.
Al endi bıyl Memleket Basshysy Qasym-Jomart Toqaevtyń tikeleı tapsyrmasymen oblys ákimdigi úkimetpen birlesip 2026 jylǵa deıingi jańa Keshendik jospardy ázirledi. Onyń negizgi baǵyttaryn oblys ákimi Qumar Aqsaqalov Úkimet otyrysynda baıandap berdi. Aldaǵy bes jylda jalpy quny 1,8 trln teńge bolatyn 87 aýqymdy is-sharalardy iske asyrý josparlanǵan. Aýylsharýashylyǵynda 52 sút fermasy, 6 bordaqylaý alańy, 2 qus fabrıkasy, quramajem zaýyty, óńdeý kásiporyndary, jylyjaılar ashý qarastyrylǵan. О́nerkásipte jańa taý-ken óndiris oryndaryn ashý kózdelgen, «Qyzyljar» arnaıy ekonomıkalyq aımaǵynyń jumysy belsendiligin arttyrmaq. Oblys joldarynyń 98 paıyzy sapaly joldar qataryna jetkiziletin bolady. 2,3 mln sharshy metr baspana salynbaq. Onyń 500 myń sharshysy áleýmettik álsiz toptarǵa qarastyrylǵan. Oblys halqynyń 93 paıyzy sapaly aýyz sýmen qamtamasyz etiletin bolady.
Halyqty, ásirese, osy másele tolǵantatyn edi. Máselen, Esil aýdanyndaǵy qalyń qazaq otyratyn Taýaǵash aýylynyń turǵyndary áli kúnge qoldan qazǵan qudyqtyń sapasyz sýyn ishýge májbúr bolyp otyr. Jańa Keshendi baǵdarlama osyndaı tasada qalyp kele jatqan aýyldardy qamtıdy degen úmit zor.
Qumar Irgebaıuly bıýdjet qarajaty shyǵystarynyń 35 paıyzy densaýlyq saqtaý men bilim salasyna baǵyttalatynyn da atap aıtty. Bul oblys aýrýhanalary men mektepteriniń sapasyn arttyrary sózsiz.
Keshendi jospar tolyq oryndalatyn 2026 jylǵa qaraı oblysta aýylsharýashylyǵy óniminiń kólemi 400 mlrd teńgege, óńdeý sektorynyń ónimderi 67 paıyzǵa, shaǵyn jáne orta bıznes kólemi 30 paıyzǵa, ekonomıkadaǵy bıznes úlesi 35 paıyzǵa deıin artatyn bolady. Osynyń bári oblys turǵyndarynyń da ál-aýqatyn arttyryp, turmystarynyń jaqsara túsýine áser eteri sózsiz.
Eń bastysy 26 myńnan astam jańa jumys oryndary ashylmaq. Bul eńbek naryǵynda turaqtylyqty saqtaýǵa múmkindik beredi. Elimizdiń jumys qoldarynyń resýrstary artyq óńirlerden Soltústikke qonys aýdarýshylar úlesi artatyn bolady. Munyń ózi ekonomıkalyq kúsh-qýatty arttyrýmen qatar eldiń qaýipsizdigine de sebin tıgizetin másele ekendigi anyq.
Úkimet otyrysynda Ulttyq ekonomıka mınıstri Áset Erǵalıev, Indýstrııa jáne ınfraqurylymdyq damý mınıstri Beıbit Atamqulov, Aýyl sharýashylyǵy mınıstri Saparhan Omarov, Saýda jáne ıntegrasııa mınıstri Baqyt Sultanov, Eńbek jáne halyqty áleýmettik qorǵaý mınıstri Serik Shápkenov, Densaýlyq saqtaý mınıstri Alekseı Soı, Bilim jáne ǵylym mınıstri Ashat Aımaǵambetovter de sóılep, óz salalary boıynsha Keshendi josparda qarastyrylǵan Soltústik Qazaqstanda iske asyrylatyn jobalar týraly baıandady. Sonyń ishinde CLAAS aýyl sharýashylyǵy tehnıkasynyń óndirisin, «John Deere» servıs ortalyǵyn jersindirý, «Aqsorań» jáne «Baıan» volfram-molıbden kenderiniń ken oryndaryn ıgerý, sondaı-aq «ready-built factory» tıpi boıynsha taý-ken metallýrgııa kombınatyn jáne jańa óndiristik alańdar salý kózdelgenin aıta ketý kerek. Sonymen qatar óńirde «Qyzyljar» saýda-logıstıkalyq haby qurylatyn bolady eken. Iskerlik belsendilikti damytý úshin áýe reısteriniń sany aıyna 16-dan 68-ge deıin ulǵaıatyn kórinedi. Týrıstik áleýetti kúsheıtý jáne sportty damytý maqsatynda Imantaý-Shalqar kýrorttyq aımaǵynda kópfýnksıonaldy týrıstik keshen, Petropavl qalasynda 3 myń oryndyq sport saraıy salynbaqshy. Medısınada salynyp jatqan kópsalaly aýrýhanamen qatar 47 medısınalyq nysandy paıdalanýǵa berý josparlanǵan. Erekshe bilim alý qajettiligi bar balalarǵa arnalǵan 400 oryndyq túzetý mektep-ınternaty jáne 16 mektep salynady. Nazarbaev Ýnıversıtetiniń tájirıbesi boıynsha joǵary oqý ornyn, sondaı-aq Akademııalyq kóshbasshy ortalyǵyn qurý josparlanǵan.
Osynyń bári Keshendi jospardyń aıasynda aldaǵy úsh jylda oryndalmaqshy. Jalpy óńirimizdi bir serpiltken jospardyń iske asýyna oblys turǵyndarynyń bári de múddeli bolyp otyr. Osyndaı jospardyń qajettiligin Úkimet aldynda dáleldeı bilgen jáne ony qabyldatqan oblys ákimdigine, ákim Qumar Aqsaqalovqa halyq rızashylyǵyn bildirýde.
