О́ńirlik kommýnıkasııalar qyzmetinde ótken brıfıngte qoǵamdyq densaýlyq basqarmasynyń basshysy Marat Pashımov oblysta sońǵy táýlikte 8 adamnan koronavırýs indeti anyqtalǵanyn aıta kele, halyqty indetke qarsy ekpe saldyrýǵa shaqyrdy. «Oblys aýmaǵynda «COVID-19» indetiniń táýliktik ósimi 0,17 paıyz bolyp otyr. Jalpy pandemııa bastalǵaly óńirde atalǵan ınfeksııany juqtyrǵan 4 493 jaǵdaı tirkeldi. Osy tusta «Halyq densaýlyǵy jáne densaýlyq saqtaý júıesi týraly» kodekstiń 77-babyna sáıkes, vaksına salý tek adamnyń kelisimimen ǵana júzege asatynyn aıtqym keledi. Vaksınadan bas tartqandar ákimshilik ne qylmystyq jaýapkershilikke tartylmaıdy. Deı turǵanmen, azamattarǵa karantındik talaptardy saqtaǵannan bólek, juqpaly aýrýǵa qarsy vaksına saldyrýdy usynar edim. Bul álemdik tájirıbe ekenin barshańyz bilesizder. Eger osy tásildi el bolyp qoldasaq, jaman aýrýdy jeńý de ońaı bolatyny sózsiz», dedi Marat Orynbasaruly.
Sondaı-aq basqarma basshysy qazirgi tańda óńirde aýrýmen kúresýdiń barlyq sharalary qolǵa alynǵanyn aıtty. Jalpy aımaqta 23 429 medısına qyzmetkeri bolsa, onyń 5000-nan astamy dáriger, qalǵandary orta býyn mamandary. Vaksına saqtaıtyn qoımaǵa kólemi 601 lıtr bolatyn 2 muzdatqysh bar. Sonymen qatar, oblystyq bıýdjet esebinen kólemi 143 lıtrlik 20 muzdatqysh alynǵan. Vaksınasııa júrgizýge arnalǵan 65 pýnkt tońazytqyshpen jabdyqtalǵan. Budan bólek, vaksınany tasymaldaıtyn kólemi 50 lıtrlik 38 termokonteınermen qamtamasyz etilgen. Al sanıtarlyq-epıdemııalyq baqylaý departamenti basshysynyń orynbasary Baqtyoraz Elemesov oblys aýmaǵynda karantın rejıminiń talaptaryn saqtamaı toı jıyndar men túrli sharalardy ótkizý toqtamaı otyrǵanyn jetkizdi. Jyl basynan beri arnaıy mobıldi toptardyń monıtorıng jumystary kezinde oblysta karantın talaptaryna baǵynbaı jumys istegen mekemelerge 1 583 hattama toltyrylǵan. Nátıjesinde 89 158 105 teńge aıyppul salynǵan.
