Sheıh Zaıd syılyǵynyń on besinshi maýsymynyń short-paraǵy alty nomınasııa boıynsha jarııalanǵan. Oǵan álemniń 57 memleketinen eki myńnan astam jazarman qatysty. Al fınalısterdiń quramyna 9 memleketten 13 avtor ilikti. Ásirese, «Ádebıet», «Jas avtorlar» jáne «Balalar ádebıeti» janrlary boıynsha áıel-qalamgerler basym túsip otyr. Bul atalǵan syılyqtyń tarıhynda buryn-sońdy bolmaǵan oqıǵa-tyn.
Atap aıtsaq, «Ádebıet» atalymynda «О́mirdi súıý» novellasymen lıvandyq aqyn Alavııa Sobh, «Jolaýshylar zaly» shyǵarmasymen egıpettik avtor Ezzat El-Kamhavı men «Inaıat Al-Zaıat izimen» atty romanmen Iman Mersal baq synasýda. Al «Balalar ádebıeti» boıynsha BAÁ jazýshysy Nasıba Alozaıbı marokkolyq Radjı Malaha men týnıstik Mızýnı Bannanı shyǵarmalary synǵa túsýde.
Bul marapattyń taǵy bir jańalyǵy, 2021 jyldan bastap kórshiles reseılik qalamgerler eki nomınasııa boıynsha («Arab mádenıeti» jáne «Aýdarma») usynyla alady.
Ár janrdaǵy syılyq ıegerlerine mamyr aıynda ótetin marapattaý rásiminde 750 myń dırhamdy (204181 AQSh dollary) quraıtyn qarjylaı syıaqy tabystalmaq. Al «Jyldyń mádenı tulǵasy» atalymyndaǵy laýreat 1 mıllıon dırhamǵa ıe bolady. Sondaı-aq «Balalar ádebıeti», «Jas avtor» jáne «Ádebıet» nomınasııalarynyń short-paraǵyna engen qalamgerler kitaptarynyń basqa tilderge aýdarylýyna beriletin grantqa quqyly. «Ádebı jáne kórkem syn» jáne «Ulttyń damýyna úles» atalymdary boıynsha jeńimpazdar aldaǵy aptalarda belgili bolmaq.
Aıta keteıik, sheıh Zaıd atyndaǵy kitap syılyǵy arab áleminiń, arab mádenıeti men dástúriniń hám arab adamynyń kórkem shyǵarmadaǵy bolmys-beınesi úshin uıymdastyrylady. Tipti tereńdesek, árıne, munyń barlyǵy rýhanı ilimniń qanat jaıyp, ult ádebıetiniń damýy maqsatynda jasalyp otyr.
Baıqasaq, arab ádebıetiniń bir keńistigin qalyptastyrǵan marapattyń dańqy jyldan-jylǵa dúnıe júziniń túkpir-túkpirine asyp jyǵylýda. Tipti, bıylǵy úmitkerlerdiń arasynda áıel avtorlardyń kósh bastap turýy da arab qoǵamynyń bir jetistigi sekildi.
